Sport, kiékpien…..

Geert stapt wat swoar van zien fiets of, hij het t ien e rug en ien e benen en….Dat krieg je met aal die tilleviziesporten tegenswoordeg, veuls te laank stilzitten veur de buis en of en toe onverwachts ien t ènne kommen as der n bal ienvliegt…. Hij zet zien karretje ien e rieg noast n “ladybike” en n herenfiets met kienderkar derachter, der hangt nog n verlept oranje voantje aan e ziekaant. Krekt as e bij de iengang van de grootgrutter komt, krigt e n fikse klap op e scholder: “Au!” “Moi, jonje!” Geert draait zuk met wat kripsie om en zigt Klaas Koens, Klaas “Kontje” liek in t gezicht. Klaas het wat kleine oogjes, mor die het e al joaren, bietje kringen doaronder, witbekt, nee, slim vereg liekt e niet. Geert vrift zuk nog even over zien scholder: “Moi, Klaas! Nog aal ien e benen, het jim die zeperd tegen de Ruzzen overleefd?” “Hol derover op, Moatjes! Hol derover op, k sloap nog aaltied niet goed, aalweg nachtmerries en spandoeken met teksten as “DE RUSSEN KOMEN!” en Robben die aan e loop is met zien eigen brankaar, en die Ooyer met n blinddoek veur, Heitinga met e benen ien e knup en die Van Barsten die mor aal denkt dat e ien e stripverhoal van Appie Happie aanland is…. Man man man, zo’n EK sloopt je, doar goa je aan kapot en dan hebben we t nog niet ies over de TT en de Toer de France en de Olumpische Speulen, ik ben doar niet op bouwd. t Het ons ok al n nije TV köst, mien vrouw het der met n nadde spons overhèn gleerd doe die Sylvie van der Vaart veur Maal Jan op e grond lag, met kramp. Nou, t was mor even, n plof en beeld vot, heb k t leste restje op mien mobieltje bekeken, doar worden je ogen ok niet beter van…”
Geert schuuft de winkel ien, Klaas ien e achtervolgen.
“Eerst mor even n bekertje kovvie, even biekommen.” Ze loaten zuk deelvalen op e stoelen ien e kovviehoek. De omgeving het zien oranje glans verloren, der is gien welpie meer te zien, ok niet op Klaas zien kar, die aans doch wel ien is veur n geintje. “Moatjes, geef me mor even wat suker. Ik begriep t niet, dat is t slimste, ik begriep der gien donder van. Zo speul je de wereldkampioen van t veld en loat je niks over van de vieze wereldkampioen, en dan kun je n week loater niks meer, brandholt! Joa, die Sar ien e goal, t was mor goed dat die bij de les was, die zag zien nije villa al ien gevoar kommen…. Mor die andern… Man, man, man… Het jonje die Kuyt verdwoasd over t veld sjouwen zien, en loater die Arsenal- kwast van n Van Persie, die denkt dat e voetzolen achter de ellebogen het? Lopt die Van Nistelrooy bij toeval met e kop tegen n veurzet aan, hoalen ze der verdultjeme ok nog n verlenging uut. En dat volk mor bibbern op die Bazeltribunes. Ik haar t wel docht, ien e kraant ston al wat over n nije grasmat, nou, dat verhoal kwam me bekend veur. Jim het ok wel zien wat dat geklungel ien e Arena opleverd het, priezen van Ajax dik onner t stof en nije kommen der niet meer bij… Nee, doar ien Bern, doar was t voetballeven goed. Schane, ik haar der zo op hoopt… Wat? Of we al weer n nije tillevizie hebben? Joa, vanzulf, votdoadelk noa de gleerramp. Zo’n plat ding, n “flatscreen”, zo numen ze dat, köst n poar uro’s mor dan heb je ok wat. k Heb wel tegen mien vrouw zegd dat ze heur EHBO-diploma niet verlengen loaten huufd en dat t gemier met die spons oflopen is, die Van der Vaart is ja doch niet op te frizzen. Joa, die Bronkhorst, dat is n Feijenoorder, dat was nog wel n goeie, die was niet allergisch veur die Hiddinkjonken, mor de rest kun je zo ien Old Oranje opstellen tegen dat HFC op ién jannewoarie…Kom, ik moet de kar nog volloaden, as strakkies dat fietsrieden ien Frankriek begunt, kan k niet op n dreugje zitten. t Mooie doarvan is dat Ruzzen en Nederlanders ien dezulfde Rabogroep zitten, Mentsjov en Pieter Wening en Posthumus, ben benijd… Enne, Moatjes, doe wat meer gymnastische toeren, dién kondietsie liekt ja naargenswoar noar. Ién klap op e scholder en ze kunnen jim al bijmekoar wisken met motblik en veger. Zo hoalt jim de eerste baargen nog niet ies… Moi!” Geert het n dreuge keel kregen van t luustern, hij tapt zuk nog n nije kovvie ien. Veurzichteg strekt e zien linkerbeen, doarna de rechter. Die Tour de France, die zál e uutkieken, met of zunder spierpien…