Ie kinnen der mit lezen en schrieven
“Ja jong, k wor oareg slap en seupel”,
zo zee mien ôl grootje lest;
Mor kiek, ain ding blift goud in order,
t Ontholden is nog meroakels best.
k Kin alens joe nog wel vertellen,
van joaren heer, oet d’olle tied;
der binnen allent mor drij dingen,
dij bin k aaid vot weer kwiet.
k Vergeet zo biester gaauw de noamen,
gezichten onthol k ok nait meer.
en t daarde… ja, dat bin k vergeten,
wat was dat daarde doch ok weer?
Geboren: 1942 in Buunderveen
Woont: op Knoal
Schrift al: sunds 1996 in t Grunnegs
Noa mien ofkeuren as directeur van n grondschoule in 1996 heb k mie as tiedverdrief wat toulegd op t Grunnings. Veur mien klaainkinder heb k n twijtoaleg boukje schreven over n hondje dat oetnaaid was en van aal beleefd. Doarnoa bin k wieder goan mit n boukje over n schouljuvver dij noa n hazzeninfarct in n verpleeghoes te laande komt. Heur ervoarens stoan in: “Getwiende droaden”, woar k nog n oetgever veur hoop te vinden.
Nou bin k mien twijde bouk: “Losse flodders” aan t deurplougen om t zoakie wat leesboarder te moaken. t Bestait oet n twintegtaal lösse verhoalen en evenzoveul verskes.
