Sans souci?

Nije woorden binnen nait votdoalek begrippen. Boomridders, ketenmariniers, gebiedsregisseur. Aal gekhaid, ja. Boomridders … zug je dat veur joe? Geharnaste ridders dij mit n zwoard òfstörmen op n boom? En wat doun ‘stadsmarketeers’? Denk ais even mit mie mit: ketenmariniers? Mariniers dij keet schoppen in n asielzuikersopvang? Dat doun asielzui kers sums zulf wel.
Onder t sausies doppen deur lees ik in kraant: ‘gebiedsregisseur’.

Wat mouten wie Grunnegers ons doarbie veurstellen? Binnen wie tenailspeulers op podium Pervincie Grunnen? Zol kinnen, vraauw Top van t Gasberoad en Schorren van GBB hebben n bult zörgen over dizze kontraainen. Ik heb doarom alvaast n stuk schreven over rebulie onder hooggeleerde ‘deskundegen’. Titel in t Hollands veur aanderstoalegen: Zonder professoren. Gaait boukenlezer n licht op? Mooi zo. Regioregie: aigenlieks CdK Paas mor wie hebben hier meer aan Johan Remkes, n kopsekop Grunneger van Zuudbrouk heer of dij Hayo Apotheker, n bliksems loze Lopster. Gemaintebeambten kriegen n beschaaiden figurantenrol, zai preveln menisters ‘deskundeg’ noar de mond mit bedenksels as ‘meer handen aan het bed’ en ‘meer blauw op straat’ (? Is kleur van Hermandaddy nog wel blaauw…?) Nee lu, centerij doar gaait t om. Gain geritsel meer achter de kelissen!
Woorden, mor… begrippen? Ik dop nog wat sausies. Hai hai, deskundegen: gedragsspychologen, bodemscheursociologen, sausielogen. ‘Bouwvakkersbusjes rollen de straat binnen’ haren ze bedocht. t Gaait over scheuren en verzakkens. Buskes mit waarklu mouten Grunneger lougjes in, zo was t idee. Mor deur misverstaand werren ze bie Vaaierhoezen ien buurtschop Viefkwinten votstuurd. Hou dat kon? Deur de meulenskwezzie. Lu willen gain luchtwachttorens mit zwaaiende prepellers van zo’n twijhonderd meter heugte. Woarom mozzen waarklu din vot? Dij kwammen mit cementmeulens! Mor lu haren zörgen over hoes en heerd en werren roeg in de kop, zai ruipen dou: ‘Hier gain meulens meer op t haim, votwezen!’ Zo komt boudel nait kloar. Zörgen doarover. Denk nou ais even mit, k heur ja niks. Joe kinnen joen aigen sausies toch wel doppen? Der gaait n bult mis in ons Grunnen!
Tribunes stoan ien Drente en Vraislaand mit spot(!) op Grunnen. Kiekers zat, mor koartjes veuls te duur. Veurstellen is doarom vergees. Typecasting: wèl paast zo’n rol? Acteur mout vertraauwen oetstroalen en nait zomor wat roupen. Deur poletieke reurings mout grimeur mit zörg koppen ienpoeiern. En din de souffleur: as wie nait oetkieken ist zekerwoar n gloepjanus oet Den Hoag, vanzulf. Dij zit stiekem in t hokje en kaauwt zien aigen teksten veur. Dat zint Top en Schorren niks. Première wordt doarom nog eefkes oetsteld. Boudel mout aans. Denk ais even mit. Mor nait zo as mien bruier. Hai is n mitdenkende huusschilder en n toalenwonder.
Hai zol veurege week mien kwint schildern. Votdoalek ruip e: ‘Hest ook sausies in huus?’
‘Nee,’ zee k, ‘wel saus … mor gain zörgen, k goa votdoalek noar winkel, begun mor alvaast.’
Dou k weerom was zee e: ‘Dien hoes haar ja gain noam, k heb der even ain opvaarfd … taraaa: Sans souci.’
‘Oh, mor wat is t begrip dervan?’ vruig k hom.
‘Joa, wat denkst,’ zee e, ‘zunder sausie!’
Noa tenail is der aaltied ‘bal noa’. Veur gezelleghaid zunder zörgen … t brengt meschain begrip aan. Meschain! Begrip is toch gain nij woord?