Saeeda

k Mag op de vetbaik van Omar. Hou hai an dat ding kwaam wait k nait. Opins stond t doar. Nee, nait opvouerd. Gebeurlek om nuver met te rieden. Beder as mit n normoale fietse.

Grinshof hait t hier. Wie hebben n joenit kregen veur us en kinders. Mit bus kwamen wie an. Gain fotse wos k. Nait woar k bin. Niks van dit laand.

Uut Herat kwammen wie hier noar tou. Hail laange en vere raais, lopen deur baargen. Mit mien jongste op mien aarm en ok nog aine in mien buuk. Mor wie hebben t volbrocht. Europa. Troapel mit al dij minsen in univörm, vroagen in toalen dij k nait verstoa. Begoazie en kinders altied mor weer aandershin tongeln. En noe binnen wie hier.

Grinshof. an n laange lieke weg. Olde bomen an baaide kaanden. Doe riedst as in n tunnel, mor den wol mit zunlicht dat doar in plakken deurhin vaalt. Dat vind k schier. Hail aans as Herat woar zunne braandt. Doar is nait zoveul beschut.

Noar ain kaande. Dat is n ind liekoet en den schaarp noar rechts. Mainste noamen hier onthold k nait. Mor doar hait t Lutje Ham. Nog verder hin over brogge is de grins mit n aander laand. Lu hebben us woarschaauwd dat wie dij grins nait overgoan mouten.

Aandere kaande bie de Grinshof. Nog altied n laange lieke weg mit olde bomen. Asofst doe deur n tunnel fietst. Minsen hier hebben kistjes laangs de weg stoan. Doar verbatsen zai heur aaier, eerpels, siepels en ok kool, temoaten, neuten, abbels. Nait duur. Goudkoper as bie supermaark hier. t Is dat Omar mie te waaineg geld geft, aans haar k mien fietstaze vol kocht.

Over drokke kruusweg. supermaark veurbie goa k rechts t wiede open laand in. Braaid fietspad ampaart noast autoweg. Hail aans as Herat. As doe doar fietst moust doe vot wezen as der n auto ankomt. Baarm in, want dij rieden dich gebeurlek omdeel.

Laangs fietspad n bred mit Kerkhorn. Poar huzen en n kist mit schiere stoofperen, poar kilo veur ain euro. Dij mout k hebben. k Stap of, lop t aarf op. Doar stoat n man mit n koal heufd mie veralteraaiert an te stoaren. Pas as hai begrepen het dat k veur stoofperen kom roupt hai aan zain noabervraauw: vraauw mit n heufddoukje.

Joa, k droag n heufddoukje, want dat heurt zo en k bin doaran wend. Minsen hier kieken mie doarop an. Mor nait dizze noabervraauw. Zai ontvaangt mie hartelk, k mag binnen kommen. Stoofperen krieg k met, ok as k dij anderdoags pas betoal. En vergees ok nog wat schiere plaantjes.

Mit alles in de fietstaze goa k hin op mien vetbaik. Dörp uut. Weer zo n fietspad. En weer olde bomen an baaide kaanden. Gevuil dast doe deur n tunnel fietst. Allinneg moakt weg noe bochten. Op n bred stoat Wedderveer.

k Veralteraaier: ain olde boom hebben dij ofzoagd. Zes stompen dij omhoog steken. Aldervrezelkst, t dut mie dinken an schooierlapzakken in Herat. Jongs dij poebel haren op landmienen te trovveln. Dij zitten laangs de weg, steken de stomp van heur ofzette bain omhoog, smeken haartvertoppend om n oalmous.

k Veeg mien troanen of. In dit laand is n man mit n blonde kuuf dij zegt dat aal butenlaanders vot mouten. k Zai hom wol ais op tv. Hai het hier hail veul anhaangers. Dat geleuf k geern as k zai hou minsen noar us kieken. Noar mien heufddoukje. Zai zeggen dat wie welkom binnen, mor bie mie mainen dij dat nait echt. As bie us in Herat n vremde komt ontvaangen wie hom mit aal us gastvraihaid, feest, eten en drinken. Hier binnen minsen nait waarm. Dij blieven op ofstand.

Na joa, k fiets mor weer hin mit mien vetbaik. Mainsttied goat t us hier doch wol goud. As der ains wat is moust doe zeggen dast doe diskremenaaierd wordst. Doar veralteraaiern minsen van. En den komt t mainsttied wol weer goud.