Rome
de aivege stad
t Is aiveg drok.
Forum Romanum
zugt zwaart van t volk
in bonte kleuren.
Verleden en heden
kommen bie mekoar
woar lange riegen
stoan te wachten veur
t Colosseum,
voutje veur voutje
weerom noar de tied
van de veurstellen
“Morituri te salutant”.
Nog even op de foto
mit n waarkloze legionair
veur ain of twij euro,
den kin t spul begunnen.
Wied weg heur k
ambulances joagen
mit gierende sirenes,
oet veurzörg alvast
en toch weer te loat.
De kaaizer dut
net as
in t verleden
op aandrang van t volk
zien doem noar beneden.
