Pteranodon

t Kwam as n ruus, n grote overvlaigende schaar. Trijnie veralteraaiert uut heur poetswaark. Zai heurt al honden in kontrainen blavven. In toen kriest swaarde liester zain alaarmroup. O God, mien popke! Mit kopstubber in aanslag stormt zai noar buten. Krek op tied om dat droakenmonster vot te sloan. Zain klaauwen al uutstrekt om heur popke uut waige te pakken. Zai slagt hom uut balans. Mit oakelge roup wendt t monster zok omme en wiekt vot knoal over richten Zèlng. Trijnie stoat te triezeln op heur bainen. Gaauw hoalt zai popke binnen. In troanen belt zai heur moeke, stokt uut wat heergong. En din plietsie. Wiekagent Aardbodem komt noar heur huus, neemt melden op.

Eerder dij dag, lutje 100 kilometers noar t oosten. Bundesstaatliches Forschungslabor in Bad Zwischenahn is in rep en rouer. Schoner liet vummerdag roam open stoan, en nou is zai ontkomen. Vot vlogen. Heur topprestoatsie, mit zoveul muite en zörg tou levent wekt en opkweekt. Vot, hin locht in. Naargens meer te zain. Verhopend klaauwt Udo Janitsch, paleobioloog, zain haanden in t hoar. t Was zien projekt, zien wichtje. Op ekspedietsie in Gruinland haren dij in gletsjeries dij prehistoriese aaier vonden, zuks 10 joaren heer. In vervroren toustand veurzichteg noar Duutsland overbrocht. Doar kontreleerd en ontdeud. Wonderboarlek genog bliekt ain aai nog levensvatboar te wezen. En op n daag, tou elkains verboazen en vertederen, kroept piepklaaine Pteranodonbaby uut aaischoal. Dij nuimden heur Suzy. Uniek in wereld, dit was nog nooit eerder lokt. Udo Janitsch promeveerde doar cum laude op. Pteranodon: vlaigend reptiel uut tiedpaark Krijt, slodderge 100 meljoen joar heer. t Kin vlaigen, grote oafstanden zweven op reuzenvleugels, spanwiedte 7 meter. Behoard, boven graauw, onder wit. Griepklaauwen, enorme nebbe zunder taanden. Op kop n kuuf in opvalende sinjoalkleuren. Joagt op visk en lutje daaiern.

“Stop!” Jella Valke trapt op rem van heur gruine jeep. As boswachter bie Stoatsbosbeheer Zèlng kreeg zai bestel dij Duutser om te rieden, te zuiken noar dat prehistoriese monster. Udo Janitsch springt uut jeep, runt noar grote grieswitte kwaalster veur heur op pad. Op zien knijen kiekt hai, roekt doaraan. Nemt n monster, joekselt dat op en omdeel in reageerbuiske, hold t tegen de lucht, grinst. “Genau, das ist ja richtige Pteranodonscheisse.” Zai binnen op Braidwisch, grote open vlakte in bosken bie Jipsenhuzen. Jella belt vondst deur. Zai was gaauwachteg ontboden op t gemaintehuus. Woarnemend börgmeester Kloas Leenderts haar zok lösmoakt uut zoveulste verzin mit COA over loage asielzuikers in Aanmeldzentrum Troapel. Hai stelt heur veur an dij Duutser. Dij was votdoadelk hierheer kommen om noar dij Pteranodon te zuiken. NL Alert was uutgoan: “As joe dij ontkomene reuzen fleddermoes zain, benoader hom din nait mor bel 112. Dood daaier nait. Blief binnen, hold roamen en deuren tou.”

Wiekagent Aardbodem was ofraaisd noar Hilversum veur oproup in pergram ‘Opsporen verzocht’. Udo is blied, in wolken mit Pteranodonscheisse. Soam loaten zai drone op veur wieder zicht op omgeven. Niks, gain Pteranodon. Haile noamiddag rieden zai om, speuren hemmel of, loaten nog paar moal drone op. Laangs Weenderkanoal vinden zai swaarm fezantenveren. Bie Udo mout dat n vos west wezen. Pteranodon slokt zain prooi gehail op.

Op zien koamer in hotel Homan kin Udo dij naacht nait in sloap kommen. Zain Suzy is hier zain, is hier kört bie. Of zel zai al verder hin vlogen wezen? Landschop hier is echt wat veur heur, mit al dij open stukken. Prima jachtrevier. Udo vuilt om zien nekke: floitje woarmit hai Suzy ruip om kommen te eten is doar nog. Hai lopt balkon op, speurt nachthemmel of. Heurt hai nou heur roup of maint hai zok dat? Hai scant hemmel of. Joa, doar hail hoog, oftaikend tegen schief van volle moan, doar zwailt zai. Hai bloast op zain floitje, mor zai is te vér hin. Nait beriekboar veur zien geweer mit verdovende pieltjes, zien vaangnet. Hoog in moanlicht blieft zai omzirkeln. Wat Udo ok perbaaiert, dichter bie komt zai nait.

Anderdoagsmörgens. Udo meldt wat hai dij naacht zain het. Meschain plietsiehillekopter inzetten? Udo roadt t börgmeester òf. Mit al dat mesjienelewaai moak joe heur baange. Din vlocht zai hin en waiten wie nog minder woar wie zuiken mouten. Wiekagent Aardbodem meldt dat minsen in Zèlng rabbeln over Hasje de hekse uut olde verhoalen van Hassebaarg. Dat dij s naachts weer deur locht vlaigt op heur bezzemstoal. Jella en Udo goan mor weer op zuik mit gruine jeep. Mussel. Molenstroade.

Albert Wubs is dik en al 80 joar. Mor hai loat nog elke dag zien hondje Fifi uut. Rondje deur dörp, even laangs bie supermaart en weer op huus an. Van NL Alert haar hai heurd. Mor doch is hai rondom verrast deur radde schaar boven hom dij zok op Fifi stört. De liene het hai goud vaast en dij holt hai vaast. t Wordt rooptrekkerij tussen hom en t monster. Albert waggelt, strukelt en vaalt veurover. Wordt end mitsleurd over stroade. Mor hai loat nait lös. Noabers kommen schraiwend aanrunnen. Monster loat lös en wiekt mit oakelge roup vot. Fifi bluidt, is gewond. Lu bringen piepend hondje noar daaiernarts in Vlagtwedde. Albert zit onder schoafwonden, hai mout mit ambulance met noar Refaja. Udo en Jella rieden om en zain niks. Op mobiel kriegen zai melden over Albert in Mussel. Zai rieden dij kaande op.

Meer meldens uut Bleksloage, Harpel, Onstwedde. Doar missen lu knien, hin en loopeend. Melders wollen benoam waiten wel heur schoade betoalen gaait. Boerenwinkel bie Wedde haar assortement vrizze Grunneger povvert buten te koop stoan. Monster bliekt doar verlustegd op te wezen, vaalt op povvert aan en sloekt dij mit cellovaan en aal op. “Is dij Pteranodon ain mantje of ain vraauwtje?” Al riedend vroagt Jella t. “Meine Suzy, klar: sie ist ein Weibchen.” “Zai is allenneg, kinnen wie heur aargens mit lokken?” Udo grinst. Uut fossiele resten haar hai ais n rekonstruksie moakt van roup van mantje. Dij loaten zai verstaarkt heuren. Oakelg gaalmt dij over laand mor der komt gain reaksie. Zai programmeren drone, zodat dij zwevend in locht roup heuren loat. Nog altied gain reaksie.

Weerom bie gemaintehuus stoiten zai op n drom journalisten. Nait allenneg riedende studio van RTV Noord, nog veul meer reporters braanden lös mit vroagen en laangen heur micrefonen uut. Zwiegend waarken Udo en Jella zok deur de drom hin. In börgmesterskoamer zit Kloas Leenderts mit Tillegroaf veur zok op toavel. SUZY SPEURLOOS staait mit kouledders op veurpaginoa. Doar onder interview en glondernde foto van Albert Wubs mit Fifi op zien schoot, baaide in verbaand. “Hebben joe dat baist nou nog nait weerom vonden?” Börgmeester kiekt triesterg. Doar ligt n stoapel schoadeclaims. Zolfs al aansproakelekstellens mit sommoatie tou betoalen van avvekoatenketoor op t Knoal. “t Mout nait maler worden. Kosten riezen paan uut. Wat mout k nou zeggen tegen pers buten? Wat adviseren joe, Herr Doktor Janitsch?” Bestuurssekretoaresse brekt in, fluustert börgmeester wat in t oor. Dij veert votdoadelk op: “Herr Janitsch, vraauw Valke, waark an winkel. Joen pieperke is weerom vonden in dinopaark bie Alteveer. Mars, doar hin!”

Mit jirrende remmen stoppen Jella en Udo op oprieloane van laandgoud Tenaxx. Direkteur Karel Oudejans stoat doar al op heur te wachten. “Tja, wie hebben hier attraksiepaark mit tientallen levensgrote plastiek dinos. Ok plastiek Pteranodon dij laangs koabelboan hoog en omdeel zweeft. Spieker doar neven loat zain roup heuren. Joen leventege Pteranondon is nait vot te sloan bie us plastieken eksemploar. Kin k heur nait holden? Zol fantastisch wezen, leventege dino in dit dinopaark!” Udo verblaikt, klampt taanden soam: “Kommt nicht im Frage!” Suzy mout mit hom mit weerom noar Bad Zwischenahn. Stug deurstappend bennen zai bie koabelboan ankommen. En doar is zai den. Suzy flottert om plastieken Pteranodon hin, sloakt roupen. Aaltemet roup weerom uut spieker. Zai is zo tougewaaid an heur plastieken soortgenoot dat zai niks aans figelaaiert. Udo kin heur noader kommen, verdovende pieltje in heur lief schaiten. Veur zien vouten doalt Suzy omdeel op gras. Zai ontspant, sloapt in. Hai kin vaangnet over heur jompen, heur votdroagen. Op oprieloane stoan reporters weer mit kameraas en mikrefoons. Zai binnen heur achtertou reden. Udo staait heur te woord en dij moaken fotos van sloapende Suzy in vaangnet. Dij stoan anderdoagsmörgens op veurpaginoa van Tillegroaf, mit doar boven in kouletters: SUZY WEEROM.