Plukken en plukt worden…
Geert Moatjes zit ien e tuunstoel achter t huus. Ien e Hartman-stoel, n makkelke stoel. Nee, niet zo’n modernistische, woar je allenneg mor noar kieken kunnen… t Is goed weer, t zunnetje schient maank de wolken, hoast gien wiend en de regen komt eerst tegen d’oavend, volgens PP. Geert het net zien muskes t middagmoal uutstreud. De Turkse törrels kommen ok n hapke meteten, de twee swoare holtduven bennen derbij, de swaarde liester zit der maank, t koolmeeske gijt supersnel hènneweer. Hier is e wies met, met dizze wereld. Dit ruukt noar tevredenheid. Geert schuuft zien pet wat noar achtern, kraabt zuk even ien t linkeroor, jeukerij. Zol dit nou n ofspiegeling wezen van t Parredies, van de Hof van Eden? Femilie van Arcadia? De tuun stijt der geweldeg bij, met aal die vluchtvriendelke struken, de boomkes, de klimmer, de vaste planten, de bloemkes. Harmke het greune vingers, dat kun je zien aan e tuun! Allenneg de slakken, die het ze niet onner controle, das min spul, mor ‘slakkendood’, nee, doar begunt ze niet aan, gien vergif ien heur tuun. As die dekselse katten nou ok nog heur vertier ien heur eigen huus en tuun zuken…… Tegenswoordeg bennen der katten zat, mor de boaskes hebben voak gien tied om der noar om te kieken. En dan kommen ze ien heúr tuun te schieten, heurt e zien vrouw weer n kreet sloaken: “Arregat!” De vogels kunnen die katten ok mizzen as koespien, die viervoeters bennen ja niet te vertrouwen! De veurege buurvrouw haar n widde en n rooie kat. Leidde de widde de vogels of en snapte die rooie ze op zien beurt! Legde ze apmoal achter de ofvalbak tegen t huus! Doar vol niet tegen te broeden! Juni? Ale katten n belletje om e nek, of ien huus, of verplicht noar n kattenkolonie… Mor ja, de meeeste kattenliefhebbers die denken er aans over….
Geert dreumt n bietje vot. Hoe zol dat met Griekenland worden? t Liekt wel op n Griekse tragedie, mor t aantal bedrieven is nog ondudelk. Hier ien eigen laand is t of en toe ok n soepzooitje. Bezunegen, ontsloagen, Oerol ien gevoar… Mor wel zo’n idioot dure JSF de lucht ienjoagen… En wat Rutte en zien kammeroaden met bepoalde zörgtoaken doen, dat is ja glad misdoadeg! Kiek, as je wat opbedenken met rugzakjes en zo, en je geven die makkelk zat aan Jan en Alleman, en as je dan loater ien e goaten kriegen dat Jan doar dik recht op het, mor Alleman niet…. Dan moet je niet Jan én Alleman de boel ofpakken! As der misbruuk moakt wordt, dan goa je doár wat aan doen, mor de goeien onder de kwoaden lieden loaten? Gien denken aan! Dat zo’n minister Schippers doar met akkoord gijt… En Rutte zulf as opperboas, ongeleuflek! En wij mor met t vingertje noar de Grieken wiezen… Was dat nou? De muskes in roazende voart ien t greun, en dan nog wieder! De holtduven der vandeur, de törrels al ien gien velden of wegen meer te bekennen… Wel verd… Die roofvogel gijt der bliksemsgauw met ien van zien muskes vandeur! Zo’n rover! n Wiekel of n vriekel?
Supersnel, behendeg, vogeltje ien e klauwen en vot is e! t Leven zit mor vrumd ienander. De ien zien dood is d’aander zien brood… Nou ja, brood….. Stukje vlees… Die roofvogel zal nou ok wel jongen hebben en vegetarische vriekels, nee, ondenkboar! Van de vogels kan Geert t verdroagen, mor as t mènsen bennen, in bobokleren? Doar moet e niks van hebben, as die ongelukkegen plukken goan! En dan numen ze zuk ok nog
Minister van Zörg…
