Op stage
Ze springt nogal es uut de baand,
wil op stage noar t butenlaand.
Ken doar n fiets van schoul bruken,
wil der vot met stad ienduken.
Fietsen op stoep is hier verboden.
Woarschaauwd is ze stroat opvlogen.
Ja, ook nog n lekke baand.
Doar staait ze den met fiets aan kaant.
Fietsemoaker het nou gien tied.
‘Zet doar mor hen tot etenstied.’
‘As joe ‘m doalek niet kennen plakken,
mag ik den wat gereedschap pakken?’
Ze zet zunder gemier of getob
fiets ien ain slag op e kop
en plakt doar ien t butenlaand
met veul bekieks n binnenbaand.
