Ie kinnen der mit lezen en schrieven
Zun verdwient,
links van mie betrekt de lucht,
achter mie wordt t antreciet,
stroalen van de verdwenen zun
breken streperg deur t duuster,
ik huf nog mor n klaain stukje,
k zai ons dörp al onder t gries,
Kingmoa’s kunstkoeien kieken noar mie.
Bie stoplichten rechts ien t laand
wachten kievitten op mekander,
t licht veur fietsers is nog rood,
t wordt aal duusterder ien lucht,
nog even en joa, ik heb t red,
zo gaauw as k deur open heb
vlaig ik deur gaang en land, hè, hè!
Coby Poelman-Duisterwinkel, geboren in Grunnen ien 1955, woont met heur man ien Aduard.
Ze schrieft gedichten, verhoalen en columns, het 12 bouken uutgeven woarvan 2 kienderbouken.
Heur leste bouk, een kienderbouk is ien 2019 uutgeven deur Kok/boekencentrum.
Ze droagt veur uut aaigen waark veur verschaaiden verenegingen, is vaste columnist bie Welkom in Zuidhorn vanof 2011.
Ze mag groag schrieven over wat heur roakt ien t leven, ze schrieft bie foto’s, bie bouken die ze leest veur de literaire kring.
Ze waarkte meer dan 10 joar met aan biebelse dagbouken, uutgeven deur Jongbloed en enkele van heur gedichten bennen op muziek zet deur componisten.
Ien de Erasmusuniversiteit ien Rotterdam is n deel van heur gedicht ‘Diploma-uitreiking’ deur NEON-kunstenoar Toni Burgering (de kunstenoar die ook de bekende dichtregel van Lucebert ien Rotterdam ien NEON moakt het) ien een Neon kunstwaark verwaarkt en dat beslacht een groot dail van de wand van Sanders Law library woar rechtenstudenten studeren. Dat dail van heur gedicht is ook ien 200 minikunstwaarken graveerd die de rechtenstudenten uutriekt kriegen as ze de bul hoalen.
Bie de opening van Sanders Law library het Coby heur gedicht doar veurdroagen. Doar kreeg ze zelf ook t mini kunstwaark overhandegd.
