Òfschaaid van De Kapitein (1)
Belevenissen mit de Kapitein…
k Zol der nog even op trôogge kommen…
In n veureg verhoal konden ie lezen, hou as k aan de Kapitein kommen ben.
Nou t ain en aander tussendeur, en doarnoa de leste: t òfschaaid…?
As wie t aits wachten konden, smoandags, den gingen wie geern richten t Damsterdaip in Grunnen, noar d automaart.
Mien kameroad haar n olle Austin kocht van Pijp oet Boertange. Omdat e nait an de proat te kriegen was, en mien kameroad doar nogal nusteg over was, zol Pijp hom dij moandagoavend trogge nemen en perbaaiern om hom in Stad te slieten. Mien kameroad zol zien betoalde geld den trôgge kriegen.
Berend haar mit veul muite t ding an de proat kregen en Pijp zol hom rieden…
“Gas geven blieven! As e die oafslagt, lopt e nooit weer!”
“Ie kommen achter mie aan he”, ruip Pijp oet t openstoande roampie.
“As e mie stoan let, reken ik op joe!”
“Aal op stee”, ruip Bé, en wie sprongen in t aander òl ding, woaras Pijp mit kommen was.
Nog veur Zuudbrouk zagen wie Pijp al in de baarm van de weg stoan te zwaaien.
“Hest n stuk taauw?”, vruig Bé.
“Nee, mor messchain kinst hom wel drukken?”, kwam nogal benaauwdereg oet Pijp zien strödde…
“Schoade veur die!”, zee Bé en stapde in zien grode Ford Custom.
“As dat mor goud komt”, was onze reaksie.
“Dat leuven ie toch nait? Veur dat wie in stad bennen zit k in zien kovver!”, laagde Bé.
En n lol dat wie haren!
Noa n poar kilometer, rolde t bumper over t stroade en even loater zwaaide Pijp nogal hefteg mit zien linkeraarm, dat e stoppen wol!
“En nou?”, ruip Bé.
“Wacht mor even”, antwoordde Pijp en sprong over t sloot richten n kwekerij.
n Zetje loater kwam e trogge mit n laank stuk taauw.
“Dat liekt mie nait veul beter as dien ol brakje”, gaf Bé hom te kennen.
“Staark genogt”, was Pijp zien mainen.
De Custom der veur, taauw der tussen en doar scheet t weer hén…
In opdracht van Pijp reden wie rusteg de maart op en dou hai docht, dat e wat aargens n steegie vinden kon, trapde op rem en draaide wat noar rechts om hom tussen t aander òl rommel te stallen.
Zien tactiek was, dat koopluu den mait zain konden, dat e sleept worden was!
Veur de Custom was ook al gaauw n steegie vonden en noa hier en doar wat snuustern zagen wie Pijp bie n ol Renooltje stoan.
“Ik stoa veur de gebreken’, was zien proatje en inderdoad, hai ston an veurkaante!
“t Austinnechie al kwiet?”, wol Bé waiten.
“Joa, en ook nog schier aan verdaind”.
Loater vertelde hai ons, dat e der n poar ,’redelke’ accu’s in zet haar veur n vlottere verkoop.
Onderweegs noar hoes kwam d geldbuul teveurschien en vertelde hai ons, dat e dij oavend 9 auto’s verhandeld haar en der 100 gulden beter van worden was.
“k Leuf, dat k aander weeke weer goa”, zee ik. “Den wil k perbaaiern of k de Kapitein verpatsen kin…?
Jongs wazzen ter nait mit ains, mor beloofden wel weer mit te goan.
“De mazzel en tot d aander weeke”, was t oafschaaid in Scheemde.