Oet olle deuze
Is t joe wel ains opvalen, dat der bie ons n bult femilienoamen binnen, oet t Duuts ofkomsteg? Denk mor aan noamen as: Scheuneman, van Lingen, Völlink, Baumgart, Dussel, Dröge, Vroom en Dreesman, Brenninckmeijer, Teuben, Peek en Cloppenburg, om zomor n poar op te nuimen. Lu dij mit heur stamboom gaangs goan, komen der achter, dat heur veurolden van oorprong meschain wel Duutsers wazzen. Aiven laang binnen ze as gastaarbaiders over grubbe noar t ‘stainreiche Holland’ tou trokken. t Was doar bliekboar doudestieds n dikke schietboudel. t Volk was stroataarm en pebaaierde hierzoot aan t waark en n beder inkomen te geroaken. Kiepkeerls en Hannemaaiers werden ze voak nuimd. Kiepkeerls verkochten hakkenak en vegezak en deden, mit heur negotie in raiten -, of wene körven op rogge, goie zoaken op t pladdelaand. Hanneke, komt ducht mie, van Johannes of Hannes, lu dij deur t maaien van gras, geld veur thoes in knippe hoopten te kriegen. In hoofdstad van Westfalen, Münster, stait nog aaltied een levensgroot beeld van zo’n koopman, Kiepkeerl of Münsterman, zoas hij ok wel nuimd wer.
Dat Duutse volk har t hier nait aaltied even makkelk. Der mos haard pokkeld worren om n oardege stuver te verdainen. Mainste lu haren dij ‘poepen’ nait veul in reken. Allerhaande verhoalen over dij domme Hans Hannekemaaijer, werden dou groag rondverteld. Zoas t verhoal van onneuzele Hans en Heinrich dij over Winschoot noar Stad wollen. Snikke was heur veuls te duur, doarom besloten ze te goan lopen. Noa n zetje vruigen ze aan aine dij veur t hoes zien laanderijen bewonderde, hou wied t nog noar Stad was. “Nou”, zee t man, “nog wel zeuven uur steveg deurstappen”. Kerels glopen nkander ains aan. t Vuil heur op t eerste zicht nait tou. “Och”, zee Hans, “dat vaalt nog mit, wie binnen mit zien baaident en dat is de man ja mor drij en haalf uur!” Ook in taimkes kwamen je dij waarklu voak tegen: Bevubbeld: Dat was aine zunder stain, zee velenk, dou har e n slakke deursloken. Of: Ik kin dat kiddeln om haals nait velen, zee n knuppel dou e ophongen wer. En wat te zeggen van: Woar rook is, is vuur, zee e, dou wol e piebe aansteken aan n vrizze peerdekeudel. n Bult gegier mor gain wol, zee t man en dou schoor e t zwien. Zo kin k nog wel evenpies deurgoan. t Volk mog geern droak steken mit dij hampelmannen. Beste maaier gong aaltied veurop en veur d’aandern dij doar achteraan kwamen, was t n haile toer dij bie te fokseln. Gain meroakel dat e Haantje Veurmaaier nuimd wer. Ons Hoantje de Veurste komt hier woarschienlek vot. Der wer wel wat vroagd van dij lu.
Honderdtwinneg tree en twinneg swad, was hier te laand n maaiers mad!
Zie wazzen hier wizze nait op verziede.
9 augustus 2008