Nuzzeln
op n nust aan d’overkaant
van t wotter tussen t raait
zit meerkoet op heur aaikes
noa n tiedje gaait ze der of
op zuik noar heur maanje
midden ien t moar komt z’hom
tegen snoavels tegen mekoar
veuruut nou doe en hai nemt n spurt
loater komt ze weerom mit n laange
dunne stok dwaars ien heur bek
wil deur as hoar-op-hond stoande
raaitstengels terog noar t nust
t gaait nait mor z’is hail loos
draait heur kopke n kwartslag
boant zok n weg der noar tou
legt mit klaaine steutjes twieg der
tegen aan, zo! doe dust veur mie
ik dou t veur die, t binnen net lu
