Noar supermaarkt op 1 dez. 2020
Vandoag de dag zit t leven vol mit allerlei geboden
Zo van: dit most nait doun en dat most loaten
Blief aanderhaalve meter oet mekoar
Dou smoellap veur! Verdold, ik kan ja hoast nait proaten.
t Volk lopt mit n flinke boge om mie tou
t Is net as in de tied van vrouger mit meloatshaid
Allain heb k nog gain roatel om mit te zwaaien
Ik wor n beetje mies, is mie dat ja n aarm verdrait!
Ken ook nait eevm gnivveln noar dizze of noar gene
En alderdeegs: k herken gain enkel bekende
Neus jeukt mie ook -buusdouk vot-,brille is besloagen
Verdold nog ains aan tou, t is ain en aal ellende.
Gauw weer op hoes aan, lekker op de baank
k Hol nait van kloagen luu, mor k mos mien gaal even kwiet
De heren in den Hoag hebben vast t goie mit ons veur
Geleuf mie mor, der komt zeker weer n aander tied!