Noar Hoes Tou
t Zaag der nait noar oet dat ol minske nog weer thoes kommen zol.
n Week of wat leden was zai opnomen ien Groot Zaikenhoes, dou dokter nait meer wos hou of hai der mit aan mos. Ze vil zo mor weg en der was eerst aan epilepsie docht. Noatied haar zai slim kopzere had en dat wol mor nait overbedern. Zai was nait meer ain van jongsten mit heur negenteg joar mor nog slim goud bie tied. Dou dokter nog dubde, haar zai der zulf op stoan dat zai noar t Groot Zaikenhoes tou wol, omreden zai wer sikkom gek van kopzere en wat beders wol as dij asperientjes van dokter. Dokter gaf al gaauw tou den hai wus wel dat e n discussie mit t ol minsk toch nait winnen kon. Ien t zaikenhoes figelaaierden hoge heren oet dat zai n dikke tumor ien kop haar en dat dij der oet mos. Onder nkander was der nog even proat over west of t muite nog wel weerd was veur zo’n oldske, mor zulf was zai hail dudelk west ien gesprekken mit dokters. Zai was t levent nog laank nait zat en wol zo gaauw meugelk holpen worden. Operoatsie ging deur.
Mor noatied haar t ter nait best oetzain. Operoatsie haar nait hail veul gouds oetricht en dokters haren kiender verteld dat t ol minsk t ter wel gaauw tou doun zol, omreden tumor zol wel hail vlug weer groder gruien. Dat t mor t beste was dat zai ien n staarfhoes opnomen wer omreden ze zol over n dag of vattien wel oet tied kommen, haren zai docht.
Dochter der achter heer en joa heur, drij doagen noa operoatsie, t ol minske was nog ains nait weer goud bie, wer zai opnomen ien t staarfhoes doar zai tot te tied oetkommen blieven kon. Omreden t laip tegen vekaanzietied, onnaaierde oldste dochter dat t hoeske van moe votdoadelk mor leeg mós, din kon moakeloar t hoes ien verkoop kriegen en konnen zai zulf noa begraftenis nog even op vekaanzie.
Dat kwam aandern ook goud oet en zo kwam t dat ol mins heur spullechies apmoal aal onner kiender en klainkiender verdaild worden wazzen en t hoeske al leeg hoald, dou zai nog ien staarfhoes op dood te wachten lag. Mor n meroakel gebeurde. n Week of wat loader haar t ol mins kop der weer op en vruig zuk of woarom of dat zai ien t staarfhoes zat en dat zai mainen toudoan was dat zai wel gaauw weer noar heur aigen hoeske terug kon. Nee, bie heur dochter wol zai beslist nait ien. En ook nait noar verzörgenshoes. Zai kon heurzulf wel weer berakken, hil zai vol en wol gainain tot last wezen.
t Wer nog n haile gedou om aal heur bullen en spullechies op tied weerom ien t hoeske te kriegen, mor noa n moand kon Geessie vannijs ientrek nemen ien heur hoeske op nije meubels. Ollen waren bie t oetroemen van t hoeske noar drekstoup brocht. Gainain van noazoaten haar dij hebben wild. Ol wiefke von t nait slim haar zai zegd. Zai was toch al mainen toudoan west dat zai t aan nije meubels tou had haar. Ook wol zai nog groag even dat t haile hoes opschilderd wer. Dat mos toch ook al neudeg west wezen, zee zai opgewekt, dou ze weer thoes kommen was. En toen was ook n drekstoup en of zai dij ook even weer schier moaken wollen en der konnen ook nog wel even spruut- en mousplanten ien. En dat maale bord mit Te Koop der op mossen zai ook mor even weer terugbringen noar moakeloar. En…
Ie begriepen wel dat kiender dij zummer nait meer op vekaanzie kommen binnen. En ol minske het t nog joarenlaang volholden en tevreden ien heur hoeske wonen doan.
![](https://dideldom.nu/wp-content/uploads/2023/08/afbeelding-36.png)