Nije stofzoegers

“Schrifst ter ook weer n stokje over, net as dou mit wasmesien?” haar mien dochter vroagd dou k heur de nije stofzoeger zain loaten haar. n Miele, net as mien veurege, dij nog mor net en zowat touglieks mit wasmesien stokkend goan was. Mit van dij handege, lutje roaden dij ale kanten op swìnken, zodat e as n siddeltòp in t ronde draaien kin. En mit nog wel meer om van te snaren. Mor n verhoaltje? “Nee,” haar k nog wel hail stelleg zegd, “want k heb ter ja gain omkieken noar. Zulfs de gebroeksaanwiezen heb k mor zuneg inkieken hufd, want ales wist zok vanzulf! Niks spannends aan dus. En ook kleur is te saai veur woorden!”

k Haar mie aans nog wel zo verheugd op de oranje Miele op internet, doar k eerst even keken haar, mit ook nog es biezunder gòie zoegkracht vòlgens d’infermoatsie. Mor dou wie noar Expert Winschoten gingen, bleek dij doar nait te koop te wezen. Al wollen ze dij gòie zoegkracht wel groag even nuanceren. De zoegmond van dij stofzoeger wordt noamelk zó moakt, dat e zok vacuüm zogt. Hail aans dus as dat k gewoon was, woarschaauwde de verkoper. Mit de kans dat mie dat, op mien leeftied, meugelk nait bevalen zol. Dat leste zee e der nait mit zoveul woorden bie, mor kon k wel aan zien ogen zain, dij mie wat bezörgd en vermuid aankeken.
O wee, dòcht ik vot, in dat geval kin oranje meschien ook wel tegenstoan goan! Ik was wel even sneu, mor heb toch mor wotter bie de wien doan en oetìndelk veur n bordeauxrooie kozen. Hai dut zien waark goud en dat is belangrieker as kleur vanzulf. En rest van tied staait e ja in waarkkaaste. Verreweg mainste tied dus!

Hopelk holdt de nije Miele t weer net zo laank vol as de veurege, want dij het mor laifst twinteg joar traauw achter mie aan rold en siddeld. In aal dij tied het e mor ain keer protesteerd en dat was pas noa negen of tien joar. t Was traauwens ook nog es n hail stil protest. k Was dou gaange aan t zoegen en in ains was t doan! Ik dòcht nog even dat k stofzoeger te ver achter mie aan trokken haar, mor nee, stekker zat nog goud in stopkontakt, zag ik. Lampen konden gewoon aan en oet en wasmesien draaide ook nog, dus t lag nait aan t elektries.
k Haar wel es heurd of lezen over koolbòzzels dij vervongen worden konden, dat ik heb vot Expert beld, doar wie stofzoeger doudestieds aanschaft haren. Ze wollen hom wel noakieken, zeden ze. En as e nait meer moakt worden kon, zollen ze dat nait in reken bringen as k bie heur din n nije kopen ging. Dat was hail billek vanzulf en vòlgende mörgen stapte ik al optied mit stofzoeger heur zoak binnen.
De manlu achter d’boalie keken t gnivvelnd aan, mor ik dee hail flink en zee: “Nee, verheug joe mor nait, hur! Ik kom hier boudel nait stofzoegen!” “Zunde!” zeden ze en noadat k heur nog even de woare reden van mien bezuik oetstokt haar, muik ain van heur stofzoeger open. Zak haar k ter mor vast oet hoald.
“Zó! Wat nog netjes van binnen, en dat noa zoveul joar. Dat zain we ook nait aal doagen!” zee e verboasd. “Zel ook wel nait aal doagen n stofzoeger bròcht worden veur reperoatsie”, zee k. “En n schuddeldouk is nait allaint goud veur schuddels, hur!”
k Hoopte mor dat stofzoeger weer kloar kon, want n nije Miele kost al gaauw n poar honderd euro. Mor gelokkeg lag t inderdoad aan de koolbòzzels, al vruigen ze eerst of k ter nog wel € 42,50 in investeren wol. Joa vanzulf! Mit n Miele dus ik dat wel woagen en k heb oetìndelk nog geliek kregen ook!

Toch binnen der gounent dij t nog beter doun, las ik op n dag in d’kraante. t Ging over n vraauw dij nog aaltied heur eerste stofzoeger van Miele in gebroek haar, aanschaft in de joaren zeuventeg. Mor dou ze t weer es aan nije stofzakken tou haar, bleken dij in ains nait meer leverboar te wezen. Ze haar Miele der over aanschreven, mor ze mozzen heur wel teleurstellen, want de spezioale zakken veur heur stofzoeger waren oet de productie nomen. Was, noa vatteg joar, ja gain vroag meer noar. Toch vonden ze t wel sneu dat ze om dij reden nou n nije stofzoeger kopen mos. Zowat haren ze nog nooit mitmoakt en doarom hebben ze heur dou oet coulance n nije kedo doan! Baaide pertijen bliede, dìnk ik, want wát n schiere rekloame veur kwaliteit en service!
k Heb mie traauwens wel hail even òfvroagd hou voak dij vraauw de boudel stofzoegde……! Wel wat filaain van mie, geef ik tou, want ook ik kon ja mooi mien veurdail doun mit heur verhoal. k Heb nou toch nog wat biezunders over n stofzoeger schrieven kind, al is t din ook over dij van n aander. En al is t ook wat kört meschien. Mor loat ik nou touvalleg ook nog n schiere mop over stofzoegers tegenkomen wezen in ain van de tiedschriften van ons leesmap! Ook weer van n aander dus, mor dat geft niks òf! Moppen binnen der om deur te vertellen, dat ik moak t mie gewoon weer makkelk! Al zel ik t wel in mien aigen woorden doun:

Hìnderk raaist hail laand òf om stofzoegers aan de man te brìngen. Op n dag klòpt e aan bie n òlle, òfgelegen boerenploats. “Moi mevraauw,” zegt e op zien vrundelkst as boerin open doan het, “ik verkoop stofzoegers! Alderbesten dij der bestoan!” Boerin kikt of ze nooit aine bie deure krigt en liekt ook nait slim vlogge, dat hai zegt: “Dizze stofzoeger zogt echt ales op! Ik zel joe wel even n demonstroatsie geven! Ie wonen ook ja in zo’n grote boudel, dat verdaint de beste stofzoeger!” En mit zien joarenlaange ervoaren lokt t hom aal kwedelnd toch noar binnen te komen. Boerin krigt gain gelegenhaid om der wat tegenin te bringen en veur ze der op verdòcht is, het e al n zakje mit dreuge rommel over grond leeg streud. Boerin kikt hom nou niksnait vrundelk aan en handen komen in zied om wat te zeggen. Mor Hìnderk is heur al weer n stap veur en zegt: “Gain zörgen, hur! Dat kin mien stofzoeger makkelk aan!” En vol overtugen belooft e heur: “Wat liggen blift, zel ik persoonlek van grond òf eten!” Nou komt boerin gevoarlek dicht bie hom stoan en zegt: “Begun din mor vot, want wie hebben hier gain elektries……!”

(Optaikend in 2016)