n Inbreker
“k Heb hom der mit de bezzem oetjagd”. Moeke kikt der hail triomfantelek bie. Ze het ons net verteld dat der vannachts n inbreker west het en dat zai hom overlopen het.
Wie kieken nkander aan mit n blik van : moeke gaait wel achteroet, heur. “Vertellen ie no ais persies hou of t gebeurd is”, zeg k en loat mie op n stoule valen. Moeke gaait ook zitten, Hanna gaait koffie zetten.
“No, ik lag op bèrre en dou mos ik noar t wc.
En dou ston der in de gaange morzo n kerel. Hou of e binnenkommen is wait ik nait. k Heb deure ducht mie nait op slöt doan. Hai ston doar riddersloagen, dee niks, zee ook niks. Dou heb ik bezzem grepen en ik ruip: “En no votwezen veurdat k die mit de bezzem sloagen kin! Opdundern!” Dou draaide hai zok om en runde deure oet. k Heb geliek knippe derop doan. En hou is t mit joe?”
Over de “overval” wer wieder nait meer proat. Wie leufden der niks van. Welke inbreker let zok votjoagen deur n ol mins mit n bezzem? Moeke dochde der bliekboar ook nait wieder over noa. Wie dronken kovvie en noa n uurtje stapden wie weer op. In de gaange zee ze: “Ik zel der toch mor goud om dinken dat ik de knippe derop dou. Je kinnen ja nooit waiten.” “Ie hebben geliek, moeke,” zee ik, “Nemen ie mor t zekere veur t onzekere.” Wie gaven heur n smok en luipen noar t deure. Dou zag ik op vlouer d’òfdruk van n schou. n Sportschou. En ik wait wis, dat moeke nait zokse schounen dragt…
