Mouderdag
Moeke blief nou mor lekker liggen
Ik mok veur die n kopke thee
Een zaacht kookt aaigie en stoet
De kraande van guster en ik ben tevree
Omstandig mit dainblad bie trap op
Zunder te graimen zet ik bred op deel
Deur van sloapkoamer op n kier in t haalfdonker
Zel ze nog sloapen t haart klopt in mien keel
Bred op heur nachtkastje noast de laamp
Heur ogen goan open en ze laagt zo laif
Ik geef heur een smokje… moeke bist wakker?
Moi mien laiverd wat bist ook n slaif
Ze gaait zitten en pa knippert tegen t licht
Wat hest ommaans, t is zundagmörgen
t Is mouderdag, waiten ie dat nait
wie mouten de haile dag veur heur zörgen
Ik loop deur de schoefdeuren van t zaikenhoes
Ze kin mie nait meer mor t is mouderdag
Een deus sokkeloatjes heb ik in buuts
t Was de leste keer dat ik heur zag