Moatjes, t mini-zwemcentrum en de vechtArena…..

“Geert Moatjes! Geert Moatjes….!” Even is t stil en dan nog n daarde moal: “Geert
Moatjes……!”
Joa, en dan gebeurt der woar Geert de pest aan het, mensen die votdoadelk noar hom kieken goan. Die dörpsomroeper van n Harm Proatjeboksem stijt ja mor anderhaalve meter van hom vandoan en wiest ok nog met zien wiesvinger noar, juust, noar “Geert Moatjes…”
“Harm, is der nog wat aans ien e aanbieding as dat gebelk?” Geert hoalt t sleudeltje uut zien Batavus, dat moet ja wel ien t grootdörp. t Mijn en dijn is doar veur paardie lu niet uutmekoar te holden… “Geert, nou niet direct doen asdat jim ien e bil beten is! Jim kan doch wel eerst even vroagen hoe t met me gijt?” “Hoe…..” wil Geert vroagen, aans komt e nooit meer van die Harm of, stijt e hier over n haalf uur nog.
“Doar hebben we t nou niet over”, zegt Harm, “der bennen belangriekere zoaken te bespreken, mor niet hier! Komt ja al weer n schip met zure appels aan…. Paulusma het zegd dat t vandoag hoast dreug blieven zol… Nou, hij het hoast geliek kregen, op drie hoagelbuien, n dunderslag, vief streep regenwotter en n dikke tak van boom òf noa… Wat n hampel. En twee doagen leden zol t niet dreug worden en viel der hier gien spat regen…”
Geert liep achter Harm aan, t nije winkelcentrum ien, woar de bosschoppenkarren kunstzinneg ien n boog opsteld stoan en je al aan e rust toebennen as je bij de grootgrutter deur t draaihekje lopen… Harm gijt vot deur noar de kovvietoavel, komt hier voaker zeker. Geert kan die plak allenneg mor vienden as e der n plattegrond bijpakt… Ien e gauwegheid sleurt e doch nog n mandje met. Woar moet e aans zien kees en beschuten ien doen? “Kom, goa der nou es even op dien gemak bij zitten, Moatjes!” Harm ploft op n stoel deel.
“Juffrouw, even aannemen!” t Wichtje ien AH-kostuum kikt hom schoapachteg aan, draait zuk om en gijt wieder met t stoapeln van blikken Bonussoep. Geert wil al stoan goan, mor Harm drukt m op zien stoel en gijt zölf kovvie hoalen.
“Zo”, zeit Harm, “het jim de kraant lezen? Ok al zien dat der twee Kollumer ondernemers n zwemcentrum bouwen goan ien e Oostergast? Joa, n eerlieks zwemcentrum. Dat komt doar stoefbij t Zörgcentrum, tegenover t Onderwiescentrum en op kiekòfstand van t Bestuurscentrum. t Stikt der van de centrums… Nou, as ik jim nou vertel dat t Zwemcentrum met n bad pronken gijt van 14 bij 6 meter! Die wetholder die zo zwiereg de haandtekening zet het onner t contract, die wil as eerste doarien zwemmen… Dat wordt pazen en meten. Die wetholder is 2 meter, leg der nog n wetholder noast, dan bennen de boanen bezet. Dure kubieke meters wotter van 31 groaden…En mor net doen noar buten toe dat ze t ei van Columbus vonnen hebben, aalmoal deurstoken koart. Dat die lu uut Kollum aan t bouwen goan zollen, ston drie, vier joar leden al uutgebreid ien e kraant. CDA en PvdA hebben ale aandere meugelkheden categorisch de nek omdraaid en nou mor groalen mit heur peuterbad. Het jim de kovvie nou al op? Hoal es even wat nije…” Geert komt ien t ènne, mor Harm Proatjeboksem stijt al vannijs bij t apperoat. “As we op die wachten moeten, Geert… Man, wor doch es wat vereger!” Geert wol ok es n duut ien t zakje doen: “Harm, mor as…”

“As, as…. Ze zetten doar n luxe wastobbe hen veur riekelu’s kiender die zwemmen leren moeten en veur therapeutisch baddern… Sportieve armoede! n Nije Krommewiedjojo kunnen we vanzulf wel vergeten en Pieter Hogeband, dij lopt met troanen ien e ogen….
Ach, sport…. Het jim dat zien ien e Arena, die zatlap van negentien die de keeper van AZ n schup verkopen wol, mor zien been niet iens omhoog kriegen kon en toen zölf n poar beste trappen kreeg? En dat misbaksel haar ok nog n stadionverbod… En leuf mij nou mor, as je Cruyff of Van Gaal as jokers ienzetten, dan heb je de poppen aan t daansen… n Haalf joar gien voetbal ien e Arena, opsluten die handel, net zo laank tot der witte rook uut e schösstien komt… Veurmekoar: Nij bestuur, nije directeur, nij elftal, nij publiek… Mor ja….”
Geert kikt es veurzichteg ien t rond, hij kan beter mor niet iengoan tegen wat Harm noar veuren brengt, ok al is t nou doch wel slim van e hak op e tak.
“Geert jong, mooi dat jim even noar n deskundege luusterd het, ik moet der vandeur. Zwemmen ien Oldekerk! De beschuten kan jim zölf wel vienden. Ajuu!” En vot is e. Geert komt ok ien t ènne, pakt zien mandje en wil net es n lekker stukje kees uutzoeken, as t wicht van de soepblikken hem aan e mouw trekt. “Meneer, zou u zo goed willen zijn even de koffiebekertjes in de afvalbak te gooien? U weet wel, goed voorbeeld….” Met t schoamrood op e koaken gijt Geert terug noar de kovviehalte en ruumt de troep op. En weer krigt t gevuul dat der n bult mensen noar hem, specioal noar hem kieken…. Hij is ja aaltied de klos. Nou mor net doen asdat der niks aan t handje is…. Al “Jinglebells” fluitend doet Geert zien mandje vol met noagelkees, volkorenbeschuut en kerstkransjes. Bij de kassa vangt e nog net op dat t doch wel mooi is zo’n minibad ien t dorp, beter n haalf ei as n lege dop, en dat de AZ-keeper zien rooie koart kwiet is. Bij de uutgang geft e zien euromunt vot aan de klungelnde accordeonist van dienst, stopt zien fietstazzen vol en stapt op. “Geert Moatjes!!! Geert Moatjes…!!” Niet omkieken, deurtrappen. Pas bij de brug hoalt e opgelucht oadem. Hij heurt nog Harm zien stem: “…..Zeggen ze ok nog dat t zwemcentrum zo handeg dichtbij de weg Grunnen-Leeuwarden leit, hebben nog niet eens heurd van de wegomlegging. Koekebakkers!”
“Och heden, koek vergeten, terug…..”