Moatjes miemert over voetbal
Geert Moatjes zit ien e stoel bij de keukentoavel en timmert ongedureg met n balpen op t kleed. Of en toe springen der wat sukerkristalletjes op, n mooi gezicht. Nou ja, hij haar n menuut of wat leden de sukerpot onnersteboven gooid en t terugbrengen van de suker ien e pot was niet hielemoal lukt. Eigelks kon e mor beter t hiele kleed van e toavel hoalen en uutkloppen bij d’achterdeur, mor doar zigt e meroakels tegenop, tis der nog niet van kommen, Harmke blift nog wel even vot. En die Sudoku wil ok mor niet lukken, de sievers springen al net zo stom as die sukerkörrels veur zien ogen henneweer….
Eerst haar e t Dagblad speld, benoam t sportkatern. Doar is e ok niet zo vrolek van worden. Neem nou dat voetbal… FC Grunnen? Zién club vanzulf en dat blift t ok, mor ze moeten niet elke keer as ze ergens op bezuuk bennen uut beleefdheid punten ienlevern. En die aandere clubs uut t noorden die Betoald Voetbal speulen? Knudde met n rietje: Veendam, Emmen, Heerenveen, wáár-de-loos!!! Doar is doch gien oardegheid aan te beleven? Nee, dan mag e liever ien dat geweldege boek kieken, dat e veur zien verjoardag kregen het: 40 Joar FC Grunnen! Doar krigt e of en toe n kick van, prachteg! Komt e aal die olle noamen weer tegen, van Otto Roffel bevöbbeld. De keeper die zo fantastisch kon uuttrappen! As e de bal haar temennent, dat ging ok wel es mis. Dan riep e: “Laat maar!!!” Lag de bal zo mor ien t net, ston Otto der beteuterd bij… Piet Fransen vanzulf met zien grappen en grollen, mor ok met geweldege voetbalstoaltjes! Klaas “Neuze” Buist, Johnny de Grooth die loater sukses haar as trainer met MOVV uut Geert zien geboortedörp. En ok wel es met n poar Vriese speulers zo as Pierke Alma en Henny Weering. Nou ja, die Weering was eigelks n Drent die emigreerd was noar Vriesland. Die zag e doch n moal n bal ieniens op e slof nemen, draaide zo sekuur bij de poal langs ien e hoek, doar wil je wel veur klappen!
![](https://dideldom.nu/wp-content/uploads/2023/07/afbeelding-161.png)
Geert trommelt nog wat met zien balpen, denkt hielemoal niet meer aan zien Sudoku… Hij zit ien t voetbalverleden en geniet! Ok n moal bij n vriendschappelke wedstried veurdat de competitie begon, ien t stadion aan de Zoagmuldersweg, n wedstried tegen ‘Rot Weiss Oberhausen’, speulde toen ien e Bundesliga. Zat der n haalfmale op e stoantribune aalweg te roepen van: “Laat ze maar kwamen!!! Laat ze maar kwamen!!!” Hij was ok n moal met zien schoolkammeroad Jakob Stiekel op e ploffiets noar de Stad reden. Jakob was niks te maal… Geert achterop, nee, gien benen ien e fietstazzen… Hebben ze de brommer, n Kapteyn Mobylette, stald bij n bekende van Jakob en toen runnen noar t Oosterpark. Geert was toen nog mor n snötneus van zo’n vieftien joar, Jakob n beetje older. Wat veur wedstried was dat toen? Was t nog GVAV….. Met die twee Duutsers derbij: Seemann en Fotnner. En Lacrois, Bram van der Hoeven was der ok al, of hoalt e nou alles deur mekoar? Nee, t was niet aaltied feest ien t Oosterpark. Geert wiet ok nog goed dat e doar es bij n wedstried keken het tegen NAC, uut Breda. Joa, diezelfde club woar ze zotterdag zo Sunterkloasachteg tegen speulen deden. Nou, dat was toen thuus aan de Zoagmuldersweg ok zo. Stonnen ze noa n haalf uur veur met 3-0, gien vuultje aan e lucht! Mor doar dacht die laange NAC-spits Van Hooydonk wel wat aans over…. Ging de FC met 3-4 de boot in, kopke onder! Doar is e wel twee doagen ziek van west….
En nou? Och, hij leest t nog wel ien e kraant, mor meer wil e ok niet met die krankjoreme wereld te moaken hebben… Gijt doar zo’n Oafrikoanse voetballer woar je de noam sikkom niet van uutspreken kunnen aargenswoar ien Rusland, of doarnoast, 20 miljoen euro’s ien t joar verdienen. En ien Spanje (en doar zol Sunterkloas vot kommen…) goan de voetballers stoaken, al twee weekends achtermekoar dat der gien voetbal te zien is. Nou ja, die ene wedstried dan, tussen Barcelona en Real Madrid, mor dat haar tegen t leste fluutsinjoal ok niet veul meer met voetbal te moaken… De achterdeur wordt met n harde klap dichtsmeten, Harmke is weer thuus. Even zit Geert stief op e stoel, dan bedenkt e zuk niet en maait met n poar brede armbewegens de resterende suker van t toavelkleed op e grond. Zo, niks meer te zien van sukerpotten die omvalen…
As Harmke de keuken ienbroest, knispert t verdacht onner heur voeten. As versteend blift ze stoan, Geert zit as n standbeeld op zien stoel, de Sudoku onnersteboven veur zuk op t schone toavelkleed… “Wat het jim nou weer uutvreten???”