Mit dokter Pol ien t zaikenhoes
t Waas n dag van wonder en geweld. Ien hal van t AVL zol Jobke vrund Haarm trevven. Omdat ter gain traainen reden van Zaandijk noar Amsterdam waas Haarm al vro op fietske van Zaandijk noar t AVL reden!
Dou ze ien wachtkoamer zaten, véúr zien behandeln deur uroloog, zagen ze op tv-schaarm n olde oetzenden mit dokter Pol, dij n reu mit n staark vergrote prostoat aan t opereren waas! Blouderege operoatsie. Reu wer geliek ook mor even kastreerd! n Mevraauw schuun tegenover heur haar de humor van touvallege soamenloop van omstandegheden ook ien de smiezen! Jobke wer oproupen, uroloog mouk n echografie en dij mos e matchen mit de beelden van MRI-scan dij veurheer al moakt waas. t Wol vot nait belukken. Aander uroloog mos der aan te pas kommen. Ientied vertelde Jobke uroloog over dokter Pol, hond en operoatsie! Uroloog vertelde hom dat reuen woarachteg zó’n dikke prostoatvergroten kriegen kinnen, dat ze nait allaain nait meer miegen, mor ook nait meer schieten kinnen! Dou nam uroloog 4 biopsies en verontschuldegde hom veur t oponthold. Zien co-assistente haar intied netjes n moandverbandje op Jobke’s goud op stoul hinlegd.
Op t lest gingen Haarm en Jobke nog even om n kopke kovvie, mor van loaver loa zee e tegen Haarm: ‘Wie mozzen mor ains op hoes aan, want ik loof verdold dat mien moandverbandje aan t verschoeven is.’ En dou fietste Haarm weerom noar Zaandijk en Jobke noar hoes.
Noa n dag of vief zol e n telefoontje kriegen over oetslag en t vervolg. Dat zol mainstekaans ienwendege bestroalen worden. Din mog e nog nait kloagen.
Dij aarm, ol reu, hou zol t mit hom oflopen wezen?