Mit Arriva noar stad

Geert zit op e baank op t twijde perron ien Zuudhörn. Hij wil met e trein, mor Arriva het doar schienboarliek problemen met. “Ketier te loat” vertelde de onzichtboare omroeper krekt. Man het aans voak niks noar veuren te brengen as hobbels tussen Stad en Delfziel. Of Roodschoul.
“Kwestie van bloaren op e iezers, haarst is n minne tied veur treinen, ok al hieten ze “Spurters”. Of hebben ze weer n old boemeltje uut t Spoormuseum hoald?” Hinnerk Zuudhof vaalt deel noast Geert op e baank. Geert kan nog net zien puutje met stoet oppakken en ien e buuts proppen. “Joa, toen ik nog zo old was as jim veur viefteg joar…. k Ging wel ies met mien bruur noar Hazzen, met t spoor, nog gien Arriva of Noordned te bekennen, ien gien wegen of velden. Haar je nog eerliekse masjinisten en kondukteurs die wat van hun bezegheid ofwuzzen, van hun affeer bij de NS. Masjinist haar ien t noajoar n bezzem bie zuk, kon e destieds bloaren votvegen, niks gien oponthold, das apmoal van dizze tied. Aal duurder, aal stoerder, aal voaker waark veur die mikerfoonreerders. Koartjeknippers konnen toen nog leesboar schrieven ok, en n proatje moaken ien joen eigen toal. Nou verstoa k ze al niet meer, ok al proaten ze…” “Dames en heren, tot onze spijt zal de trein die normaal gesproken…”De rest heurt Geert even niet deur de hoestbui van Hinnerk Zult, die nachtvorst mor slecht verdroagen kan.
“Harregat, krop zit schier vol, apmoal sliem, zit nog veul meer…” Hinnerk begunt vannijs te kuggeln.
“Wat zei die man krekt deur de mikerfoon? Gien trein? Welv… t Moet doch niet gekker worden. Ik moet op tied bij t Paleis van Justietsie wezen, akkefietje met mien achterbuurman en wij willen der gien TV-vertonen van moaken. Kinst dat ding niet aanzetten of der is wel weer n soepzooitje veur, of n Riedeltiesjoo, hoe hiet dat, van Jan Smit & Co. Of ze hebben weer n wedstried bedacht veur aankomende modellen, iesdaansers of gebelschoppenontwaarpers. Ik hol niet van dat gedoe, geef mij mor n rugbiewedstried of n Geheime Zender op e radio, doar ontspan ik me grandioso bij. Gijt jim ok noar Stad?”
Geert haar al ieder bod wat zeggen wilt, mor hij komt op zo’n moment niet veul verder as luchthappen, n mishottjede goldvisimitoatsie.
“Joa, ik moet even noar….”
“Dames en heren…”, de omroeper van dienst loat zuk weer heuren, “…de trein van…” “Wat zegt e nou??!” Hinnerk Zult het zien geheurapperoat ien e hannen en kikt Geert aan mit n vergrelde kop. “Nou”, zegt Geert, “de volgende komt ok niet, der lopt n koe op e rails aan dizze kaant van Griepskerk, die mut eerst….” Hinnerk pakt n deuske uut e buuts, dut zien apperoat derin. Deuske verhuust weer noar e jaas. Hinnerk gijt stoan, wiest met zien laange leiter noar zien steern en stovvelt noar de uutgang. Hij spijt nog ies venieneg op e rails, asdat die der wat aan doen kunnen.
Geert pakt zien stoetje uut e buuts, moakt t puutje open en zet de tanden ien e snee brood met pindakees. Hij loat zuk niet vernaggeln deur die Arriva hakkenkrukken, wis en vast niet. Hij wil noar Stad en hij gijt noar Stad, met e trein, ok al duurt t n hiele dag. Wat zullen we nou beleven? Hij veegt de krumels op e grond en smit t lege puutje ien e ofvalbak.
Zol der nog wat van kommen, van die KlaasWybo-Express met e stop bij Noordhörn? Soort sneltramtrein ien stee van die rondrietdalweg? Fantesie het die greune veurman wel. Kunnen ze bij Burgler ienstappen en dan zal dat Koopmanbedrief…… Mensen op perron doen apmoal n tree noar veuren, de trein ridt langzoam, stopt. “Gien grode”, denkt Geert. Dan wordt e opnomen ien e drukte en viendt e zuk weerom ien e barstensvolle gangpad, bietje duzelg. Hij kan zuk krekt vastholden aan e glimmende stang, linkerschienbien tegen trapper van n fietske, anermans rugzak tegen zién rug, vrouwmens met te veul aan Chanel en te weineg ruumte bit hum hoast ien e neus, opschilderde kop, doar huuft gien wintervaarver….
De trein ridt. Geert gijt noar Stad. Moderne tieden….