Mien peerd

· Detmers, Ab

Ik heb n peerd zunder steert hou liekt joe dat tou
Nait best zeker k kin t aigliek wel begriepen.
Mor mien peerd is mie hail wat weerd k wait wat k zeg kom nou
Ie maggen mie gerust veur alles verslieten.

Want nait allain bie mooi weer mor ook bie störm en snij
Rie k op mien swaarde ros en stoef deur t loug
De mensen dij kieken mie noa en denken och dij
Is nait goud bie of komt net oet kroug.

Van n Daam over Jukkerd noar Glins en Zieldiek
Froksel ik mit n grode houd op kop liekoet
Van Mij noar Holwier en doar over diek
Bie Naansum doar is keroazie ter nog laange nait oet.

Ie zellen nou wel denken dij vint dij is messchain wat slicht
Hai denkt dat hai n cowboy is oh wat n os
Och och ie hebben t nait begrepen mor mien peerd dat is mien fiets
Mien edel swaart haard stoalen ros.

• Facebook
• X
• LinkedIn
• Email
• Print

Gedichten

Meer van t zulfde:

• Noar strandje van Delfsiel

• Moetje Noatuur

• Luddevedut

Achtergrond info:

Woont in: Delfziel
Schrift al: joaren

Joa, op t heden is schildern weer n luk bietje in bie mie, mor der is n tied west dat ik as ain van d eersten van de Grunneger Schrievers nogal drok bezeg was mit schrieven verhoalen vertellen en dichten.
Toal en Taiken hebben toun hail wat van mie opnomen. Kunstgang Kaampe in Steem bin’k ook nog bie d oprichten west.
Zoas eerder zegt, k heb t nou drok mit schildern en tentoonstellens. Kiek mor even op mien Web-log, din krieg je n beeld van mien doun en loaten. Der stoan ook wat verhoaltjes op in t Grunnings. Dij toal mout der inblieven en smis tot groot verdrait van elk en ain proat ik (lel ik?) lekker deur. t Gait aal zo makkelk.