Merie
Dou k zes joar was, göng k veur eerste moal noar legere school 75 in Buunderveen. Bewoarschool was in dat joar noa Twijde Wereldoorlog nait meuglek. t Schrieven mos veureerst mit n griffel op n laai. Noadat juvver Jansen t reseltoat van t waark in heur schrifke schreven har, mos je laai in n emmer woater dompeln. Van dij gevolgen, je weer mit n hemmelde laai begönnen konnen.
We zaten in vaarde klazze mit roem datteg kinder under knoet van mester Diek, dij wind der goud under har. Aine van zien ‘underdoanen’ stak der bie mainsten mit kop en scholder bovenoet. Nait omreden ze boven ons oetstak wat lengte aangaait, mor deurdat ze in ogen van jongkerels t nuverste wichtje van haile klas was.
![](https://dideldom.nu/wp-content/uploads/2023/07/afbeelding-89.png)
k Har mazzel dat Merie krek veur mie in baanke zat. k Mog haile dag tegen heur achterheufd aankieken. t Dee mie wel wat. Sneu genogt zag Merie mie schienboar hailemoal nait zitten. k Was slim jeloers op elks dij zoch in heur aandacht spinzen mog. k Was nogal schieterg van oard. Gain hoar op kop dij der aan dochde heur aan te spreken. k Zol t vervast in boksem doun van bangeghaid. Ainmoal heb k Merie aanroakt. Ze swaaide mit heur ‘peerdesteert’ boven mien inkpot en dou heb k hail verzichteg moanen wat underoet laaid, van dij gevolgen t oetende in pot teregte kwam. Man man wat n boudel! Dou ze heur omgaf, gaf ze heur klasgenote mit heur inksteert n fleer om kop. Laaiden was in last. Mester zedde mie bie kop en kont boeten deure. Mit n braifke in haand mos k votdoadelk noar hoes om mien zunden op te bichten. Mog nait eder weeromme komen aleer mien voader of moeke mie brochde. Mien achterwaark dee al zeer, bie gedenk aan kontjeloage dij k van mien moeke wizze kriegen zol. Krek as t spul sprak. Dou k mie op achterste ploatse bie mien olden vervougde. ( Wazzen baaident drok dounde op t eerabbellaand ) , kreeg k noa mien referoat van links- en rechtsom. Kont vluig mie sikkom in braand.
Lopend as n hoaze mos k veur t oldske op fietse moaken dat k thoes kwam. Swait luip mie nog van kop dou ze in heur oetlopersgoud mie weg noar school wees. Wat der in t opkoamerke van bovenmester ofspeuld het, wait k nait vanzölf, mor noa uren- zoas t leek -mog k binnenkomen en noa veul vieven en zessen en ach en wee’s en nog meer spietbetugens mog k mie weer in klazze melden.
t Mooiste wichtje van klazze, nee van schole of nog beder van hail Bunderveen en omstreken het mie nooit meer ok mor mit ain oge aankeken. In klas zezze is Merie van schole goan en mit heur femilie verhoesd noar Austroalië. Bie heur ofschaaid het ze school soamen mit heur bruier Rieks traktaaierd. Pude slik vleug op plaain dur lucht en elks kreeg n kaans wat van grond te kriegen. t Span mos thoes n nije pude hoalen. Kin mie der aans nait veul meer van veur gaist hoalen.
In t laand van onze tegenvouters schient ze nuver boerd te hebben. Is mit heur stoefan doezend weke bie tillevisie as omroupster te laande komen. Is traauwd en schient n poar kinder op wereld zet te hebben. Rieks is as evangelist noar Nij Guinea vertrokken
15 oktober 2010