Meerlander Volkslaid
Wie binn in Meerland geboren,
In Meerland doar heuren wie thoes.
Bie ons is nog nooit ain bevroren,
Ons Meerland is nait veur de poes.
Wie leven bevrund mid ‘n ander
As Noabers en vrunden in ‘t loug
Wie binn tevree mit mekander
En waarken dat leren wie vroug.
Refrein:
Meerland, o Meerland, doar is het nat,
In winter stait het onder woater moar wat zol dat.
Meerland, o Meerland, doar is het goud,
Doar leven wie as echte noabers zoas ‘t ook mout.
De koien dei bòlken van Meerland,
De swienen dei gieren het oet.
De kikkers dei bloazen de Jasband,
In slootswaale in ‘t roet.
Moar kom je ais boeten in ‘t duuster,
En ‘t windje waait over het Sùd,
Den heur je zo’n stiekom geflùster,
Den heur je ain smakkend geluud.
Refrein:
En vroag je ain wicht om ain doetje,
Den zegt ze: Och hoal dien fesoun.
Moar loater den draait ze heur snoetje,
Ain smokje dat magst doe wel doun.
Het vrijen dat is toch gain zönde,
De Oalen dei hebben ons ‘t leert.
En as der gain vrijers bestonden,
Den luip het op Meerland verkeerd!
Refrein:
Oet de BATO Revue 1933, schreven deur J. Woltman.
