Lof
Noa t wegvalen van leste van generoatsie boven onzent wordt n aantal femiliebouken herverdaild. Mooi winterkerwaai om dat aan t èn van mirreg oet te zuiken. Swoare tas sleep k mit noar baank. n Steveg boukwaark komt mie ien handen: ”De Bijbelse Geschiedenissen, in vertelling door W.G.v.d.Hulst en in tekening door Isings.” Op roakeldais sloag k hom open en lees over Jonas dij op n rotsachtege heuvel te wachten zit tot t vrezelke gebeuren zel, over Amos de simpele schoapherder en viegekweker oet Thekoa aan raand van woestijn, over jonge koning Hizkia en schaar van zunnewiezer dij achterwaarts ging, over stille lutje vent Jeremia oet dörpke Anakot tussen baargen ien, over Daniël en zien kameroaden Sadrach, Mesach en Abed-Nego, over Nebucadnezar dij ien ainen krankzinneg wordt en mit daaier oet t veld et, over Belsazar en haand dij Mené, mené, tekèl, Ufarsin op muur schrift, over Esther en….. Ik wis nait meer dat Ahasveros dij snaachts altied meziek heuren wol, nou vragt om veurlezen te worden en veurlezer pakt boukrol woar Mordechaï op staait, over de 47000 dij noa 70 joar ballingschap van Babel noar Kanaän trekken, aal mor noar t westen woar zun soavends onder gaait. Dij vertraauwde verhoalen. Vibroatsie van herkennen. Twijde bouk is zo meugelk nog dikker. Ollers heur biebel mit traauwtekst Exodus 33: 14,15. Hij dan zeide: Zoude Mijn aangezicht moeten medegaan om u gerust te stellen? Toen zeide hij tot Hem: Indien Uw aangezicht niet medegaan zal, doe ons van hier niet optrekken.
Even wieder vien k n onbekende foto van opoe Sietje woar k noar nuimd bin. k Heb t hoar aal n poar doagen opstoken net as zai.
Ik liek op heur.
![](https://dideldom.nu/wp-content/uploads/2023/05/afbeelding-115.png)
Etenstied is aal laang verstreken. k Moak n makkelk hapske kloar. Witlofsloa. Aai koken, abbel en augurk snieden, rezienen waiken ien kop thee, mandarijnen zuiken. Ik huzzel alles deur n kanner en neem t mit ien koamer. t Smoakt goud, mor toch aans as aans. Hou dat komt, zai k as k bord noar keuken breng. Witlofstroekje ligt nog op aanrecht. t Is dudelk. Poar uur heb k ien totoal aandere belevenswereld west.
Groningen, 21 januari 2008.