Loat t (nait) zo wezen

Leste tied is t ja onnuur. k Kreeg der onbestendeg gevuil van in buuk. Kraanten stoan boornstevol mit allerhaande verhoalen over ons in 2000 zo bejubelde euro. Aalsmor meer laanden mozzen zo neudeg dailen in ons vreugd. Gulden verdween in rad tempo op t pepier- en muntkerkhof. Oetwozzen kregen n set muntgeld om wegwies te worren in eurolaand.
Riek en aarm mogten zoch alliekewel schoedeln aan rieke eurotoavel. t Gelok kon ja nait op! Guldens kwammen in t vergeetbouk, al rekende mennegain stiekom wel ains weeromme. t Levent wer n stok duurder, mor t zel wel goud komen, dochten wie ongeaargd.
Noa ongedochte kripsie, dij oet Amerikoa overwaaide en finanziële terugvaal en noodzoakelke bezunens, vuilen n poar septiele bruiers om. Ierlaand kreeg mit pien en muite boudel weer op glee.
Griekenlaand was twijde dij haanden ophuil. Doar was aans gain zaalf aan te strieken. t Volk vuilde zoch joarenlaank bedrogen deur bestuurders, dij eerstens aan aigen knibbe dochten. Wel mout t geld doarzoot aanzuvern? Juustem! Eurolaanden van t eerste uur.

Nou ok Itoalië, Portugal en Spanje heur rekens opmoaken en miljarden tekört kommen, maggen rieke laanden weer touspringen. Hou laank blift geldstroom open, veur en aleer onze aigen schatkist t loodje legd? Wat beurt der din? Kriegen we onze haarde gulden trogge, of goan we mit nkander aan d’appelladde. Man, man wat n spul! Wazzen we mit n koppel rieke laanden mor nait aan euro goan. Ons deur Kok en Zalm zo prezen euro wer stoareg aan n neuro, zeuro of zölfs n treuro!
Noakomende vrakke dailnemers mouten we mit mekoar oet pudde slorren, of we t groag doun of nait. Of kinnen we nog weerom? As we goie ‘Puutholders’ leuven maggen, is zokswat nait meer wenselk en meugelk. k Bin slim benijd, wanner we mit haandenvol euro’s doch nog mit lege haanden stoan.
Wel helpt ons din oet prudde? Huiven we din allinneg bedroagen mor weer te dailen deur twij komma twij en n bedie, of worren onze bezittens in toukomst meer as halveerd? Of binnen sinten, hoezen en gebaauwen plotsklaps gain eurostuver meer weerd? Harregat, doar mout k ja nait aan denken! Kinnen we din mit nkander op hongerkaambe?
Is t pepiergeld riep veur t hoezie? Bloots handzoam om t gat of te vegen? Of mouten we ons zoer verdainde spoarsinten kuutje buten veur n stoetje haard gold. Vandoage kostte n kilo gold ja al n dikke zesendatteg- honderd euro’s.
Aal goud, mor woar mout je dij zwoare kloe- ten loaten? As je wat neudeg hebben, kin je der din n stokske ofschrappen, of kriegen we van baank doarop wat krediet? t Zel onze tied wel oetzitten, mor onze kinder en klaainkinder binnen dommee pineut. t Liekt verdikkemie wel of inde der tied der aan komt voamen.
k Wens Puutholders en kezorten n haile bult wieshaid en n oetzunderlek stel hazzens tou!