Koh Lo Yuk

Wonsdag 29 jannewoarie 2025. Aaldoagse grieze winterdaag. Lieke noar Chin.Ind.Rest. Kota Radja, porzie koh lo yuk mit witte ries ofhoalen. Tussen twai keremieken laiwen deur under Chinees ofdak kom k binnen. Bestel en betoal, goa zitten waachten tot eten kloar is.
Mor t is wat besunderes. Vraauwlu achter boalie binnen feestelk anklaid. Ziede klaide in vlammende koleuren. Zai baiden waachtenden gelokskoukjes an op ain bred. “Chinees Nijjoal”.
Haar k van heurd. Chinezen vaaiern heur nij joar op aandere doatum. Vandoag. k Breek mien gelokskoukje open, lees flitter pampier: “Pak dien boudel en run”.
Doar begriep k nou niks van. Aal waachtenden haren zuk ain flitter pampier. Apmoal mit dizze tekst. Wie repen scholders up, kieken nander meewoareg an. Elkenain blieft zitten, wie waachten ja op ons eten.
Restaurant is optuugd mit laampjes. Rikken, bakken en panen stoan kloar veur t lopend buffet. k Zit tussentied mor wat te googelen. Chinees joar van de Droak loopt of en joar van de Slaange begunt. Droak is wichteg, zulfverzekerd, overheersend, naarsk onvlamboar. Slaange is gehaimzinneg, slinks, roukloos. Apmaol astrelogie: kulkouk, ver van mien berre.
k Heur schuven. Stoulen, toavels valen om. Laange rugge mit schobben slentert over deel. Chinese jonkjes in slaange van houpels en douk?
Deurdringend sistern hoalt mie uut dreum. Opins en kort bie stekt Slaange zain kop op. Huveringwekkend en zain spletene lappe tast hinneweer noar us.
Tougelieks uut keuken oorverdovende brol van Droak. Dij is dudelk nait akkoord doar met. Rook spijt uut alle glieven en uut loek woar normoal eten deur komt schait reuzen steekvlam. Apmoal pakken wie us boudel en runnen.
Kifkerie tussen Droak en Slaange, dus vot wezen. Noapoestend stoa k an overkaant van Turfweg. Vuur in restaurant. Rook siepert tussen panen deur. Word wolk, kolkende kolom. Doar under grote braand. k Ken ook nait bie mien auto kommen, braandweer het alens ofzet.
Chinese vraauwlu in heur vlammende klaiden krupen bibberend bienander. Mien moaltied ken k op mien buuk schrieven. Haar hom al betoald. Sowieso ain ballentent, dizze Chinees. Aander moal mor noar restaurant Peking in Vlaagtwedde.
k Bin kold en aarger mie. En kiek omhoog. In griestinten van rookkolom zai k heur om ainander hin swirren. Droak en Slaange kraiweln in locht. Doun uutvallen noar ainander. Altied hoger, altied verder hin in lochtruum boven Pekela. Tou dat zai verswonden binnen.