Koekies
Vandoage de dag is der veul meer keus as vrouger …
Guster haar vraauw bitterkoukjes hoald, en doar ben k stoapelgek op! Elke bod bie d’kovvie mor aine was mien advies. Dreugen ze nait oet (k slurp vaar moal doags twij kopkes). De leste tied kommen wie nait tekört. Wat n weelde!
Net asdat je op joen older nog achter de computer stappen. Wat n meugelkheden! Je toetsen n woord in op ‘koegel’ en d’haile wereld trekt an joe veurbie. Bin je zaik, zuik t op de gezondheidslijn. Nait, dat t probleem din oplöst is, mor je kinnen dokter van advies dainen om gaauw beter te worden. Mooi man!
Tuurlek zitten der ook male kanten aan. Zo wil ik geern mitwaarken om t veur mien leveranciers simpel te hollen, mor zai moaken t joe wel oareg stoer. Krieg aingoal n mitdailen, dat betoalen over de pc veul makkelker is en dat je din naarns meer om denken huiven. An mien hoela! Betoalen via dat ding? Never noeit! Ter verdudelken: ik heb inmiddels de gezegende leeftied van 78 en den vaalt t des te stoerder om joen zoaken oet handen te geven. Buutse vol mit paskes is mie al slim genogt! Pincodes kin k nog wel onthollen, mor van aal dij verschillende wachtwoorden mou’k hailendaal niks hebben. Bah, kop knapt joe ja van aal dij riegen sievers en letters!
En t leste joar kommen doar ook nog koekies bie.
Hou nou koekies, wat is dat den weer? ‘Wij gebruiken cookies. Als u instemt met het gebruik ervan, kunnen we u nog meer van dienst zijn!’ En den kin je op t schaarmke akkoord intoetsen. As je nait akkoord goan, krieg je gain mitdailens meer van t bedrief, n toets mit nait akkoord zit der nait op! Dizze koekies smoaken mie hailendaal niks! As je akkoord goan, bliekt dat ze aal joen handelingen op de pc noagoan en joe den ‘van dainst binnen ‘ mit aanbaidens, woaras je gain spier verlet van hebben! Loat mor zitten! De neudege klantenservice kin je vanzulfs ook via de tillefoon of olderwetse post kriegen. Per tillefoon via n stemcomputer dij zowat n ketaar aangeft, dat der ‘nog wachtenden voor u zijn’ en per post, dij vanzulfs wel oareg laanger onderwegens is. Zo het elk bedrief zien aigen kiek op service.
Mien leverancier van gas en licht, Essent, woaras ik vanòf varenzesteg bie aansloten bin, stuurt mie in oktober n mailtje mit de vroag of mien moandliekse biedroage nog wel hoog genogt is. Zai willen veurkommen, dat je achteròf biebetoalen mouten, dat is ja zo sneu! Ja, ja! n Dikke moand loater … ”Een heuglijke mededeling, meneer van Z.: de energieprijzen zijn gedaald in 2016!’ En den bliekt op joen bankòfschrift, dat je zo’n honderd euro per joar minder betoalen. As je heuren, dat d’euliepries meer den de helfte doald is, en de pries van gas doaraan koppeld is, wordt t joe graauw veur d’ogen en heur je joen hazzens kroaken! ‘Dat is zo’n 10%!’ Bliekt dat de regeern de belasten derop mit roem datteg persent verhoogd het. De goldmien van Grunnen het Den Hoag goud in t zoadel hollen. t Ging veuls te mooi! Van spoaren of reserves aanleggen wollen ze nait waiten. Poen zat joh, Was heur devies. Nou der minder boord worden mout en de pries van t gas oareg doald is, zitten ze in de residentie mit n groot probleem? Van bezunegen hebben ze schienboar gain keze eten. Ja, op aarbaid, zörg en dat soort zoaken. Mor idiote hazzenspinsels mouten oetwaarkt worden. Stilstand is achteroetgang! In t noorden is de waarklooshaid groot en zit n groot dail van t volk in de perblemen. En dat noa roem viefteg joar levern van t neudege gas (lees: poen).
t Wordt tied, dat ze doar in de Randstad ais n koekie van aigen deeg kriegen!
