Kindergebed

Moeke wilst mie wel vergeven
As ik die verdrait doan heb
As ik nait aaltied de vreugde
Van dien levensdoagen bin

Mogst doe mie meschain ais sloagen
As ik die verdrait doan heb
En t dut zeer, mien laive moeke
Din heb ik veur die begrip

Wanneer wie soamen schraiven kinnen
Van angst en piene, moeke
Den kikt God vol erbaarmen
Op zien minsenkinder tou

Dou k geboren bin mien moeke
Kwam ik uut dien waarme lief
Zomor in de kolle wereld
Woar k nou aal n tied verblief

Hest doe ook begrepen moeke
Wat ik aal deurmuik doudestieds
Dat ik t van hail vèr mos hoalen moeke
En ook slim allinneg was

Dat dee mie verdrait mien moeke
Doarom heb ik aaldeur schraifd
k Wait dat dee die ook verdrait
Troosten wie ons mit doeke doeke

As wie soamen schraiven kinnen
Van angst en piene moeke
Den kikt God vol erbaarmen
Op zien minsenkinder tou

Doe bist nait meer bie mie moeke
Hail laank is t al weer leden
Dastoe mie allain luitst moeke
t Dut mie nog ale doagen verdrait

Sums schraif ik nou allinneg
Van angst en piene moeke
Mor God kikt nog ale doagen
Op zien minsenkinder tou