Keerskes
t Was n schiere boom dij Gezienus en vraauw hoald haren. Wel n beetje aan dure kaant mor och, t is mor ainmoal ien joar Midwintertied en din dou je wat. Op wintersport gingen zai dit joar nait en kiener kwammen ook nait op veziede omreden dij wazzen mit nkanner noar Amerikoa tou om doar “Xmas” ien zun te vieren ien “The Sunshine State”. Opa en oma kwammen dit joar ook nait, omreden zai overwinterden ien n appartement ien zuden van Spanje. Gezienus en Geesje haren t riek dus allain en wollen ter ook even van nemen ien aale rust en zoas t heurt.
Ditmoal ais gain kunstboom. Dij laiten zai mooi op beun. Zai wollen n eerliekse ollerwetse spar oet Sibboeren, bie kweker vot. Ien veujoar hoalden zai doar aaid bloumkederij veur ien toen en zai wozzen dat hai ook kerstbomen grootbrocht mit laifde veur zien vak. “Wat ie ien buurt kriegen kinnen, mout ie nait ver veur aan raais goan”, zee Gezienus ja voak.
Allain roek al dou zai boom achter ien auto haren, dee heur ien t veuren genottern van t feest van optugen en versieren.
t Dee Gezienus dìnken aan vrouger, dou hai n lutje jong was en zien pa aal joar, n week of wat noa Sunnerkloas, mit kerstboom thoes kwam as e noar vijmaart ien Stad west haar.
Hou of t leste moal haldaal verkeerd òflopen was. Dat kwam zo. Moeke haar net nije overgerdienen ien veurkoamer kregen, van dij zaachte gruin ferwailen gerdienen dij tot op vlouer kwammen. t Was ook nait goudkoop west, zekerwoar nait en zo braid haren zien ollu t ook nait had. Zien moeke haar gerdienen zulf naaien doan en dat was nog n hail kerwaai west op ol trapmesien, omreden stof was mooi dik west. Doagen was zai der van smörgens tot soavends mit aan loop west, din t mos en zol apmoal kloar veur kerstdoagen as femilie over vlouer kwam. Den wol zai boudel ribschier hemmen. Dat was heur goud òfgoan en moeke was aibels wies west dou gerdienen der hongen. Dou was pa der mit kerstboom over tou kommen. Doar wer n holten kruus onner timmerd en soavends noa t melken kwam boom ien houk van veurkoamer te stoan tussen twij roamen ien. Omreden koamer was nait slim groot wer boom vlak ien houk zet. Moeke dee nije gerdienen der veurzichteg achter en bie nkanner tegen muur aan. Doar mog ja niks mit gebeuren. Dou wer boom versierd en optoakeld mit kerstbaalen en slingers en engelhoar en der kwammen ook hollertjes ien mit eerliekse keerskes. Dat was sekuur waark, den keerskes mozzen persies rechtop stoan aans graimde t zo mit keersongel op boomtakken en der onner op kerstklaaid dat onner boom vlijd was. Doudestieds mit echte keerskes ien boom was t nog zo dat bloots op kerstoavend keerskes veur t eerst aan moggen. Tot t zo wied was, mog ie allain mor noar boom kieken.
Op kerstoavend haile femilie gezelleg bie boom en noa t nijs van aacht uur mit weersveurspellen op radio, zee pa dat t zo wied was. Keerskes moggen aan. Feest kon begunnen. Gezienus en zien bruiertje keken tou hou pa mit luzivèrs keerskes ain veur ain aanstook en joa heur, t ging aan. Op n duur braanden aal keerskes en wer boom n eerliekse brannende kerstboom. Wat mooi was dat en wat wer t n schiere kerstoavend mit nije gerdienen tou. Wat zaten ollu tröts en voldoan mit kiener bie boom. Dou t bèrregangerstied was veur kiener, blous pa keerskes, dij nog mor haalf opbraand wazzen mit n dikke poest ain noa aaner oet, zodat ter ook nog wat overbleef veur aanerdoags as femilie op veziede kwam. Op kerstzundagmörgen was t hail stil ien keuken dou Gezienus van bèr of kwam. Zien moeke zat ien keuken en hoelde. Wol nait vertellen wat of ter loos was. Prevelde allain mor wat over n rötboom. Gezienus en zien bruiertje begonnen van weeromslag ook te hoelen. t Was n verdraitege boudel mit nkanner. Dou Gezienus en zien bruiertje troost zuiken wollen bie kerstboom ien veurkoamer, kwammen zai der achter dat haile boom verswonnen was. Houk van koamer was leeg! Wat keken zai maal. Nou wizzen ze ook woarom heur moeke zo’n verdrait haar en begonnen zai nog haarder te hoelen. Loater het moeke heur verteld en konnen kiener ook zain wat of ter gebeurd was. Ien nije gerdienen zaten dikke vlekken haars dij oet takken van kerstboom kommen wazzen en wieder zaten der apmoal witte vlekjes ien gerdienen. Dat was keersongel dat ter ienkommen was dou heur pa keerskes soavends mit n beste poest oetbloazen haar. Moe heur schiere nije gerdienen wazzen verinneweerd en kerstfeest was over west. Boom lag mit keerskes der nog ien achter schuur op misdòb. t Wazzen hail verdraitege kerstdoagen west. Gezienus kon t zuk nog heugen as dag van guster. Ollu hemmen nooit weer n kerstboom ien hoes hoald. n Joar of twinneg noatied, dou Gezienus op ploats kommen was en ollu der oet gingen, wazzen vlekken nog te zain west ien veurkoamergerdienen en haar Gezienus veur zien moeke nije gerdienen kocht ien t nije hoes wat wiederop. Dou haar zai vannijs schraifd mor was t aans west.
Noatied haren ze bie Gezienus thoes wel n kerstboom opzet, mor t was aaltied n kunstboom west mit noamoakkeersen der ien. Kiener haren dat ook wel schier vonnen, mor haren voak vroagd woarom of heur pa en moeke nooit n eerliekse boom hemmen wollen.
Gezienus schrok op oet zien gedachten dou zien vraauw hom vertelde dat ze aibels blied was mit heur kerstboom en dat ze der aal noar oetkeek om dij toavend op te toakeln mit heur twijbaaident. Dat leek Gezienus ook schier tou en knivvelnd zee e: “Mor gerdienen hoalen wie der eerst even òf, dochstoe ook nait?”
