Jezebel

t Klopte. n Achteròfstroatje zo as t heurde. Mit hoezen dij sikkom op punt van omvalen stonden. n Achteròfstroatje, gruine smurrie onner tegen muren op. Lege kratten en deuzen en aan t ìnd bie n hoge blinde muur n matras mit kringels der in. Mor achter blinde muur zag e aal t silhouet van wottertoren. t Gevoarte stak as n grode voest boven t gewemel oet. 1500 kubieke meter wotter. n Groot onnuur bakstainen gedrocht. Haalf-puthaalf-regenwotter-architectuur. Bie dit decor heurden vanzulfs n bult roustege fietsen. Muren van roege stainen, laank leden n moal wit vaarfd. Der zaten hier en doar nog snibbels pepier op van n aanplakbiljet, t haar wat te doun mit protest, mit n politieke spreker. Hai duurde nait mit rug tegen muur leunen.
t Was te graauw en smereg. Links en rechts wat blinde roamen en schuuns veur hom n klaain trapke mit n gammel iesdern leunentje en n zwoare deur. Boven deur zat n laamp, t licht luit t rood van deur opschienen noar oraanje. Noast deur aan linkerkaant zat n bred van koper. ‘Artiesteningang’ haar e aal wel honderd keer lezen. ‘Artiesteningang Tattoo-bar’. ‘Artiesteningang Tattoo-bar’.
Doar zol ze deur noar boeten kommen, haar ze zegd. Doar zol e op heur wachten. Om hom tou ging nacht deur mit zien bezegheden. Rechts van hom luip de Ingenue-loan. n Kilometer vermoak veur toeristen en aander pretvolk. Der ronkte n stadsbus veurbie en twij taxi’s gingen vol op rem. n Koppeltje opschoten goud ruip en reerde en ging t leste geld verknappen in de Tattoo-bar.
Hai keek weer noar deur en dou veur de twintegste keer op zien horloge. Der was aal n uur veurbie. Ze zol vast nait meer kommen. Hai luip weerom noar houk en keek noar ingaang. Twij jongkerels sluigen mekoar op scholder en stapten Tattoo-bar in.
Toch wol e nait weggoan. Mit n poar treden stond e weer op zien stee tegenover deur. Der ruirde niks. Allenneg t lewaai van t verkeer en t geroup van haalfdronken volk op Ingenue-loan.

Hai luit zuk op berre plovven. Stak zien kop onner t kuzzen. Hai wol ze nait zain. Hai wol niks zain. Hai wol nait zain, dat zien koamer gain roamen haar. Dat der gain oetzicht was. Dat der allenneg de muren waren mit n vrumd soort behang. Links en rechts noast schösstainmantel hingen twij grode spaigels. Gedrochten waren t. Golden liesten mit veul frummeltjes en krullen. t Muik nait oet hou of dat e keek, altied zag e twij widde poedels. Ze zaten in spaigels. Links aine en rechts net zo. Ze lagen mainsttieds te sloapen. Ze druigen roze strikken om haals. As e onrusteg in zien kop wuir, den gingen ze rechtop zitten en draaiden hun koppen zo dat ze hom altied zain konden. As ze rechtop zitten gingen of stonden, den wuir t slimmer in zien kop. Hai wis t nait zo goud. Nou wol e ze nait zain. Hai haar kloagd bie verhuurder. Dij gaf nait thoes. Aalmoal domme proat. Honden in spaigels haar ze nog noeit van heurd. Op tied huur betoalen en din was der wieder niks loos. Hai haar t zulf perbaaierd. Spaigels kon e nait van muur kriegen. Ze zaten vast mit zwoare bolten. Ain oavond dou e lezen wol, haar e twij grode badloakens over spaigels goeid. Noa n haalf uur haar e ze der weer of hoald, omreden dat e nait meer tegen n gepiep en gejaauwster kon. Hai haar badloakens op berre legd en was n rondje lopen goan. Dou e n uur loater weerom was, lagen ze te sloapen. Zunder groot licht aan te doun was e in berre schoten en was in sloap valen. Hai keek nou onner zien kuzzen vandoan en zag dat de widde krengen wat onrusteg in de weer luipen. Hai sloop noar zien keukenhoukje nam wat kant-en-kloare pankouk en smeerde der jam op. Kaarzen of frambozen, hai zag t verschil nait zo. Der bleven veur mörgen nog vaaier over. Onder t aanrecht in rechterkastje vond e pakjes drinken. Nait over doatum. Dat was n geluk. Hai koos veur sukkeloamelk en slampte twij pakjes achtermekoar leeg. Mit rug stond e noar spaigels. Poedels bleven rusteg, ze keken wel mor deden wieder niks.

Ze ston in t widde licht van n spot en zong. Hai kreeg n roar gevuil in t lief en der luipen twij dikke troanen over zien snoet. Hai schraaiwde. Dat was aal wel twintig joar nait veurvalen. Aal wel laanger. Schraaiwen was zwakte. Altied stoens kieken, ook aal dee t nog zo zeer. Bie n pak haauw of bie de gemainste woorden. Stoens veur die kieken. Omdraaien en trankiel weglopen. Niks zeggen. Dat male gevuil in t lief wegdrukken. Mor nou zat e zunder geluud, zachtjes te jaanken. t Kwam deur heur doar in t widde licht. Hai luit zuk bekeukeln deur t licht, opwekt deur n computerpergram. Doezenden gekleurde puntjes licht vlogen in t rond. Zai ston door roerloos en zong. Ze stond doar in n laange donkerblaauwe jurk. Ze haar swaart hoar. n Kört koppie mit gitswaart hoar en ze bewoog laangzoam op moat van meziek. Hai nam n slok van zien bier en graimde n grote gobbel over zien bezoen. Hai kon der niks aan doun. Ze zong en ze zong. Hai was bekeukeld. Dou t laid laangzoam verdween in ferwailen gerdienen op achtergrond, begon elk te klappen en te reren.
Hai nait. Hai bleef stil zitten en keek en keek. Hai kreeg n vrumd gevuil in t lief. Zien lutje jong wuir puber en was op zuik noar roemte. Zolt wotter luip hom over t gezicht. Schoamtevol veegde hai mit aarm dizze dikke troanen vot. Hai luip noar veuren en ging vlak veur heur stoan en begon te klappen. Nog n moal veegde hai t gezicht schoon mit zien aarm. Zai keek over hom hìn noar t aander volk in zoal. Hai zag heur blode aarms. Ieselk widde polzen. Laange dunne vingers. Op linkerpols aan binnenkaant zag e heur tattoo. n Vlinder. Hai herkende de rode stippen en t geel in vleugels. Ze druig n Jezebel. Vlinder vernuimd noar vraauw van Achab. Zai, dij altied heur zin deurdreef. t Applaus verstomde en ze keek noar hom en stak n haand oet. Ze ging haalf deur knijen en hai dee n stap noar veuren. Hai greep noar heur en kreeg heur haand beet. Hai keek noar heur en noar heur tattoo.

‘Jezebel’, zee e.
Zai knikte langzoam. Ze draaide heur aarm zover deur, dat e goud zicht haar op de vlinder. “Om twee uur ben ik vrij, wacht dan achter op me. Dan gaan we wat drinken.” Ze sprak nait. Ze fluusterde, ze zingzegde de woorden. Hai luit heur haand wegglieden en ze draaide zuk om en luip laangzoam vot.
Hai wis nait wat hom overkwam. Dou der n kerel mit n saxofoon begon te speulen op t tenailtje was e weer bie zinnen en luip e weer noar zien toavel weerom. Zien glas was weghoald en t bekeukelde gevuil was vot.
Hai slingerde verdwoasd noar boeten, en heurde nait dat jongelu mit pukkelkoppen hom de gek aanscheerden. Of e ook verkeern vroagd haar. Ze sluigen mekoar op scholders en wezen noar hom en roegbekten mor deur.
Wellicht haren ze keken hou e zuk aansteld haar, doar veur bie t tenail. Hai huil daip oadem. t Leek wel of e doen was. Verbilderd stond e wat rond te kieken.
Veur hom wuir n man aanreden deur n VW Golfje. Hai zag dat nait. Hai zag noabeelden van doarbinnen. Van heur mit heur laange jurk en heur aarms en heur… Hai kreeg ook nait mit, dat t swaarde autootje wat achteroet stak en mit n draai om t slachtoffer tou ging. Oetgoanspubliek bleef stoan en dee niks. Joa, ze staken mobieltjes omhoog en muiken foto’s. Man bleef liggen. Dou der noa n beste zet toch hulp kwam, was e aal deurlopen en draaide e deur van zien koamer van t slöt.
Ze druig n tattoo van n Jezebel.

Dou e honden in spaigels weer heurde kwam e weer wat bie zinnen. Hai ston mit haanden veur oren. Hai drukte stiever en stiever en dee op t lest zien ogen derbie dicht. Hai kon dij verrekte daaier nait meer verdroagen. Ze sprongen op en gingen te keer as wilden. Ze trokken baaident bovenlip op en luiten geelwidde taanden zain. Kop ging omdeel en ogen spoten vuur. Hai keek en begreep der hailendal niks meer van. Boeten heurde hai sirenes en t geflipflop van n helicopter. Nog gekker wuiren baaide honden. Kwiel luip heur tot de bek oet. Hai schudde zien kop en duurde zien ogen nait meer open te doun. Grond schudde eefkes onder zien vouten. Hai verloor sikkom zien evenwicht. t Lewaai van poedels was nait meer te harden. Noar boeten, weg hier, docht e. Wat was der wel nait loos. Hai schrok van n knal. Noar boeten. Noar boeten. Vief menuten loater luip e weer over Ingenue-loan. n Grode, roodwidde magneet trok hom noar dat aine stee. Hai was t korreltje iesder dat stuurt wuir deur d’onzichtboare krachten van magneet. t Was aldernoast. Hai luip stroat in en oet. Verdwoasd.

Doar ston e weer in t stinkende gaankje. In t steegje bie artiesteningaang. Over Ingenue-loan gierde n ambulance. t Oetgoansvolk haar doar gain oog veur. Ze vlogen krougen in en oet. t Begon aargens te rommeln, zien oren toeten van lewaai. Knallen waren t, achtermekoar deur.
Scheuren zigzagden omdeel in muren. t Leek of e dronken was. Grond waggelde onder zien vouten.
Toch bleef e op zien post bie artiesteningaang.
Ze zol toch wel ais n keer noar boeten kommen. Weer sidderde grond onder zien vouten. Hai verloor zien evenwicht en knapte mit zien heup tegen n betonpoaltje. n Obstoakel beduild om auto’s bie t steegje tegen te holden. t Dee vernaaide zeer. Wanneer kwam ze nou noar boeten. Hai was doodnijsgiereg wat ze van hom wol. In gedachten huil e ploatjes van eerder noar boven. Zai op t tenail in t licht en den dij vlinder op heur pols. Dij ieselk widde aarms. Dij Jezebel-vlinder mit de kleuren zo schier op vleugels. Weer kwam dat lamme gevuil in zien onderlief. Weer haar zien lutje jong meer en meer roemte neudeg. Der kwam n helicopter over en n bundel lucht pletste deur steeg. Twij grode rötten vlogen vot onder kratten en kartonnen deuzen. Weer trilde grond, weer wuir e in de weer slingerd. Hai huil zuk aan t poaltje vast en zag hou dat n grode scheur van boven noar omdeel zigzagde in achtergevel van Tattoobar. t Schiere bred mit ‘artiesteningang’ kwam lös en bleef op ain bolt hangen. t Stainen trapje mit leunen stond nou lös van t gebaauw. Noast hom kwakten wat dakpannen in doezendenzesteg stukken. Hai mos hier vot en hai mos hier blieven. Weer kwam der n pongeltje dakpannen omdeel. Hai luip terug noar Ingenue-loan om vandoar oet stief noar dij aine deur te kieken. Hai wol heur tegenkommen. Hai wol waiten wat der speulde. Woarom zai, oetrekend zai mit hom proaten wol. Of messchains wel meer. Wat mos e doun as ze aargens noartou wol om wat te drinken of zukswat. Hai greep in zien kontbuuts en keek in zien knip. Wat klaaingeld en n biljet van vief. Dat was niks. Hai mos minstens viefteg, nee minstens honderd euro hebben. Den kon e n moal van volk roupen. Der mos wat gebeuren. Woar was hier n pin-automoat? Wat e ook bedocht, t was aal te wied vot. Weer vloog helicopter over en der wuir wat omroupen. Der was te veul lewaai om te verstoan wat der deurgeven wuir.
Binnen in de bar stond n pin-automoat. Doar kon e gaauw wat geld hoalen. Dou e drij stappen zet haar, luip e weerom en kraabde zuk op kop. Twij, drij tellen keek e noar deur haalfschaid t stroatje. Der ruirde zuk niks. Zo snel as a kon vloog e bie Tattoo-bar noar binnen. Hai drukte twij Japanners opzied. Doar was gain kunst aan. Automoat vruig of e ook n bon wol. Hai wol gain bon, hai wol honderd euro. Hai heurde binnen kerel mit saxofoon. Zai was aal west. Snel. Snel terug noar boeten, noar steeg. Zien pepiergeld frommelde hai in t klaainste buutsje van boksem. Guster was ze nait meer kommen, messchains haar ze vanoavend beduild. Hai wol weer noar binnen, om te kieken of ze messchains toch nog aan t zingen wol.
Nee, dat mos mor nait. Noar oetgaang en doar wachten. Doar zol ze kommen. Zai mit de Jezebel -vlinder op pols. Hai kroop wieder vot in gaankje en dou in aine ging deur open. Deur stoekte en aan binnenkaant wuir der goud haard ropt. Hai wol wel opspringen en mithelpen mit drukken. Verlamd bleef e stoan. Weer dij knallen. Weer nije scheuren in muren veur en achter hom. Dou ging deur toch hailndal open en kwam alles omdeel. Deur t stof kon e niks meer zain. Hai hapte noar lucht en docht dat e stikken zol. Op zien gevuil luip e in richten van deur. Strompelnd en stroekelnd kwam e bie t stee, woardat deur zeten haar. As n wilde begon e te groaven in de stainbrokken. Overaal om hom tou bleef grond schudden en trillen. Dou e eefkes stopte om n poest lucht te nemen, zag e dat wottertoren ondersteboven ging en t gejauster en gebrul en t gegil van minsen was nait van lucht. Weer dook e op kop in stainbulten. Hai wol zien Jezebel redden. Aargens siste gas. Hai rook t. t Wuir levensgevoarlek. Kokhaalzend strompelde hai over stainen en stukken holt. Der stak, bie wat net nog n deur west was, n haand oet puun. Doar mos ze liggen. In zien kop gingen nou honden ook te keer. t Was nait te harden. Hai was der hoast. Manlu luipen steeg in, bleven stoan en begonnen te roupen. Hai zag haand en pols mit vlinder-tattoo. Hai trok en trok. Langzoam kwam n aarm teveurschien. t Kroakte wat. Dou e wat stukken stain opzied drukd haar en n baalk overzied kreeg, kon e nog wieder. Der kwam nog meer aarm teveurschien en dou n blouderge haals en n gezicht. Dit was gain… Dit was nait zien Jezebel. Weer ruipen manlu en t gekroak nam tou. Hai keek verbilderd noar t gezicht. Dou kwam alles wat nog stond hinter en twinter omdeel. Wottertoren dekte mit 1758 kubieke meter drinkwotter alles in steeg tou.