Jan Aalbers
Jan Aalbers kon der ok wat van. Mit peerd en woagen pebeerde hai zien gelaanterie aan vraauw te brengen.
Wis al deksels goud woar hai zien neren t makkelkst slieten kon. Manlu waren veur zien handel volkomen ongeschikt.
Dij haren meer aan t bezuik van n taauwsloager, dij ok allerhaande geraidschop in kare bie zok had.
Jan verkochde van alens en nog wat. Pannen, potten kopjes en schuddels, messen, lepels en vörken, laampen en as t zo oet kwam, wat aandre romtommelderij. Hakkemak en vegezak, om t mor es aans te zeggen.
Zo haar dij maal Jan n zekere moal haand legd op n pertij doamesjurken. Joost mog waiten, woar e dij opdoan haar.
Overaal in kare lagen dij ‘polten’. Om aandacht te trekken, haar e zölf n klaidje aantrokken. Mit n mutse op kop, daansde wat om zien negozie tou.
t Peerd wer zölfs wat schrikkeg van zien maale fratsen. Wel zien potsenmoakerij nait zag, wer deur n olderwetse koubel wel van smans aanwezeghaid op hoogte brocht. ‘Zain dut verkopen’, gold ok hier en Jan haar n goie omzet.
Zokse meroakels haar dij goetjeboksem aalweg. ‘n Löslopende hond vangt aaltied wat’, was zien levensmotto. Haar aaltied en aiveg lag aan t gat hangen en verdainde mit zien streken meer as menneg aander.
Loater het e wel ais verteld, dat dou e ain vaarde van zien jurken verkocht haar, de rest al dikke winst was. De leste polten het e as poetsdouken weggeven.
Thoes haar Jan ok n hoop jurken liggen. Vraauwlu oet buurde luipen hom deure zowat plat en ok t wief dee goie zoaken. Vraauwlu broekten heur sloapkoamer as klaidkoamer en bie n kopke kovvie mit grunneger kouke werden der monsterachtege zoaken doan.
Sneu genogt, dat dit soort lu oet t stroatbeeld verdwenen binnen. Zie gaven teminzent nog wat kleur en fleur aan t alledoags bestoan.
De mainste kiepkerels binnen op de duur meer honkvaast worden en hebben n neren aan hoes opzet.
t Was grotendails doan mit t gezwaalk langs s Heren wegen. Thoes was t makkelder en veul waarmer. Ok haren ze doar veul meer keus.
n Groot aantal zoakenlu hebben zodounde heur affeer n nije richten geven. Noadail veur klanten was wel, dat ze der nou zölf op oet mossen. Veurdail, dat ze nou n bult meer keur en vergliekensmaterioal haren.