Is joen knippe ok moakt van siepelleer?

Kerel nog aan tou, wat gaait t er vandoag de dag om tou. Geld is amperaan t bedrag weerd, woar t op drokt is. Net as senten en stuvers in dij goie olde tied aan koper minder opbrochde, din dat der op ston. Geld bewoaren in n sok mag wel nait traauwd wezen en niks oplevern, mor je waiten wel wat je hebben.
Bie n Baank mout je mor ofwachten, of ‘hoge omes’ der nait mit vandeur goan binnen. Lainen, om n persent rente, sloden geld oet an twievelachtege boetenlaandse ‘griepstuvers’. Denken vervast, dat t allenduvel Sunnerkloazen binnen. Dat lu zokswat mit aigen stuvers doun, is tot doar aan tou. Aigen schuld, dikke bult, zol k zeggen. Mor dat Gemainten en Pervinzies zo roeg mit ons geld omspringen, brekt mie klombe. Wel betoalt reken? … Juustem, wie mit nkander. Doaders verkroepen heur op t kerkhof. Onzichtboar, mit n dikke pongel geld, dat ze van t volk stolen hebben. Zel t doch woar wezen, dat geldduvel aaltied op n bult schit? Zol ja van rötten besnuvveld wezen! Dou doar as Jan Boezeroen mor ains wat aan. Wie blieven mit sores en lege knippe zitten.

Hou is t in hemelsnoam doch meugelk, dat mensen zokswat nait aan kommen zagen. Aan top van Baanken stoan doch verdikkeme gain dompies. Kinnen over t aalgemain meroakels goud reken, veuraal as t om aigen ‘spiekers’ gaait. ‘Jan mit Pet’ mout mor zain hou e oet dizze kripsie komt. Zölfs ‘Drees-trekkers’ binnen bie leste tieden nait wizze meer, of ze heur dail van t geld, dat ze mit nkander mit haard waarken bie mekoar sprokkeld hebben, nog wel in voldounde moate kriegen. Haren ze der in heur waarkzoam levent der zölf mor boas over speulen kind, din haren wizze n hoop lu der beder veurstoan as vandoage. Ok Regaaiern van ons kikkerlaand is der euvel mit aan. Gript as n haalfmale in ons spoarpot. Doun dik en gröts van ons vermogen. Mit recht n segoar oet aigen deuze.
Bats kriegen wie der groates bie! Geldboom gruide in haile wereld, dochten ze, boven bomen oet. In n bult romtommelderij zit n baarg locht, dij zel veureerst verdampt worren mouten. Hoezenmelkers en hoezenbezitters binnen pineut. Inains draaien Lainbaanken kroane sikkom dichte. Traauwen zölfs mekoar nait wieder as zie nkander zain. Doardeur roaken lu heur ‘kostboare, dure’ hoezen aan stroatstainen nait meer kwiet en dij bakstainen liggen mennegain bar zwoar op moage. Woar t hingait? Zel Wouter Bos t wel waiten? Ik nait!