Infiltrant 2

Bulten mijd riet en roet. Dij liggen alderwegens laangs òpschoonde sloten. En k heb wat uutdacht. As k onzigtboar wezen wil kroep k onder mien kamoeflaziejazze. n Jazze in schutkleur, hailemoal volstikt mit sliertjes. Onder dij jazze lig k den doodstille op de grond. Gainain dij mie zugt. Elkenain beschaauwt mie as zuk n bult roet.
Der is oorlogsdraaigen uut Rusland. Europese landen tugen heur legers op. Meer soldoaten, meer woapens, meer oefeningen. Ok bie de Natsjonoale Rezerve (Natres). Dij oefenen in Westerwolle en k speul d’infiltrant. Infiltrant 2, want der bennen er meer. k Mout Nederland binnendringen, n bom ploatsen in n belangriek overhaidsgebaauw. Gain echte bom, mor n stikker mit t woord BOM derop. As t mie lokt dij op t gebaauw te plakken is mien mizzie sloagd.
100 soldoaten van de Natres bennen laandsverdedegers. Zai mouten dat mit dij bom veur wezen. Zai mouten mie opsporen, mie vaastpakken of mie roaken mit n paintball uut heur geweer. As dat lokt hebben zai mien bomaanslag verhinderd. Alens is oefening, mor wie speulen t bloudeernsteg.
Nachte, stikdonkere nachte. k Word dropt, de jeep van de kommendant riedt vot. Aargens in Duutsland stoa k, kört bie de grinze. Op n stille lieke wege, an weerskaanden akkerlaand. Mor der staait wol n bred. In t lichtje van mien tillefoon lees k over de smokkelroute van Neudersum. De Kovviebonenschloot dij hier van de wege òf t laand in stekt. t Is n daipe dreuge guil dij lieke noar de grinze lopt. Generoatsies smokkeloars mit zwoare puten kovviebonen op heur rugge luipen hier deur dizze guil ongezain hierhin. k Goa d’aandre kaande op.
Tillefoon uut, dat dij mie nait paailen. In d’heugte de rode lichten van de windterbines. As der al n laandsverdediger boven in zuk n windterbine te kieken zit, den zugt hai mie nait in dizze guil. Zo laange t nog donker is mout k kilemeters moaken. Want t is nog n hail end noar t Knoal.
*infiltranten opsporen is onze opdracht*wakker blieven, ok as der niks te zain is*nait verslabben, altied schaarp wezen*bie elke brogge over t Tijdensknoal woaken wie*kieken wie mit verrekiekers, naachtkiekers, n drone*wie hebben zukses*infiltrant 1 is pakt*dij docht ongemaarkt de Zèlnger brogge over te sloepen*mooi nait dus*
k Mout sloten over. Springen is opvalend. Den stek k boven t maaiveld uut. Dus woad k der deurhin. k Word kold en nadde mor blief onopmaarkt. An mien zwaarde trainenspak zugst nait dat t nadde is. Mien spul in n wodderdicht heuptasje. En dus dij kamoeflaziejazze. De grinze ligt achter mie, k sloep noe deur t Boukwaaitveen. Dammeet mout k t Tijdensknoal over. Ok zwemmend. En k blief uut t zigt van de broggen.
t Begunt licht te worden. Noe bin k al bie de Rijsdamme. Laangs de huzen hin bin k t laand in stoken. Stille om gain sloapende honden wag te moaken. In de veumirregdook moak k n droai om t loatste huusje hin. Doar begunt n hond te blavven en k zai ok wat bewegen. Dus roerloos op de grond, de jazze over mie hin. k Bin weer n bult roet laangs de slootkaande.
Mor d’hond trapt doar nait in. Hai staait bie mie te blavven, snuvvelt an de jazze. Klomben kommen noader bie, schuven deur t gras noar mie tou. n Stok tuit de kamoeflaziejazze n zetje op. Shit! Hebben dij mie noe al ontdekt?
“Moi wichie” zegt n vrundelke oldemanstemme. k Kiek, kroep van onder de jazze weg.
“Huvst nich baange wezen. k Verroad die nich heur.” n Gezicht as van n uutdreugd appeltje laagt mie tou. “Hest verlet van n kop kovvie?”
Der zit niks aans op as joa zeggen.
In zien huusje brandt d’holtkaggel. En de waarme kovvie is n woldoad veur n kolde nadde infiltrant. d’Hond is op mien vouten liggen goan en waarmt ze op. t Olde mantje is n sproakwodderval, k huf niks weerom te zeggen. Hai stokt uut hou hai in d’oorlog onderdukers bestopte en woar in t huuske. Loater smokkeloars hielp. Mor hai het nooit aine verroaden. Hier kört bie ligt zien bootje in de Ruten Aa. “Zel k die noar d’overkaande voaren?”
t Is noe hailemoal daag. In zien bootje bin k weer n bult roet. Zo kom k an d’overkaande. Boven ons t snorren van n drone in de locht.
Noe is der hail veul bos. Ideoal terraain veur n infiltrant. Gainain zugt mie, ok de drone nait. k Stek de Zeuvenmeersveenwege over noar de Beetserwiek. Dat is beder den deur t open laand noar Muzzel. Want doar bin k veul te zigtboar, veul te kwetsboar.
*de dronebilden loaten n verdacht bootje zain*doar goan wie op òf*n olde man mit hond zegt dat hai van niks wait*bracht enkel mor wat roet noar d’overkaande*d’infiltrant zol noar t Knoal goan kinnen* ekstra aandacht op de route doarhen*Muzzel, Vledderveen en omstreken*den kinnen wie hom doar pakken*
De Beetserwiek. n Endloze zandwege woar k gainain tegenkom. An weerskaanden bos en bomen om in weg te duken. En t regent haard. Kold en nadde mor mooi dat dij laandsverdedegers noe schoelen. Den kin k ongezain mien kilemeters moaken.
Ongezain docht k. Mor hai het mie al zain. Uut de verte ruipt hai, komt mie tegemuit. In de regen en hailemoal bepakt mit n rugtaze, kovver en uutpulende winkeltazen.
“Trappel!” ruipt hai, n Donker jong. “Trappel!” t Duurt even veurdat k hom begriep. Hai sprikt gain Ingels, dus mit haanden en vouten duud k hom uut dat hai d’aandre kaande op goan mout. k Nim zien kovver en n winkeltaze van hom over en lop mit hom met. Hai is Azerbeidzjaan. Wie zellen best opvalen, twij van dij nadde bepakte feguren in de regen. Mor op infiltranten gelieken wie zo nait. Bie de Veurbeetsewege wies k hom hou hai noar t Anmeldzentrum komt. Ofschaaid, hai bedankt mie wol duzend moal. Regen is stopt.
Hier goa k lieke deur, verder laangs de Beetserwiek. Tot de Brummelbaarge tou, tegen t Muzzel Aaknoal an. Nog juust op tied zai k doar de twij laandsverdedegers. En in de baarm bin k weer de roerloze bult roet. Zai zain mie nait, lopen wat hin en weer. Aine gaait kort bie mie stoan pizzen. k Heur heur reporteren *in sektor E gain biezunderhaiden* En den lopen zai vot. Ongezain sloep k
d’aandre kaande uut. Laangs t knoal richten d’autowege, de N366.
Hou kom k in ain zet ongezain over dij wege en over t Wildervanckknoal doar nevvens? Deur hier t wodder in te goan en onder de wege deur te zwemmen. An d’overkaande der uut, deur n stroke bos hin en den t Wildervanckknoal overzwemmen. t Lokt en k bestop mien dierboare kamoeflaziejazze in t riet. k Bin noe op de Zuderknoalwege en lop as n joggende vraauw richten t Knoal. Rusteg runnend, somtieds mien bainspieren stretchen tegen n hek, n zetje lopen, n bietje eten uut de tuup noodrantsoen. En k gok dat de laandsverdedegers nait verwachten dak dizze omwege nim. En ok nait waiten dat dizze infiltrant n vraauw is. En k bin hailewel nait de ainegste vraauw dij hier n trainensrondje lopt.
Laandsverdedegers zai k in aals geval naargens meer. Wol aandre joggers en ok viskers op heur stek in t riet. Aine van heur moakt n proatje. n Dikke man, n generoalspedde mit drij steerne op zien heufd. Hai zit onder n reuzen pareplu, het genog bier bie hom veur n haile dag visken. t Zit hom dwaars, al dij butenlanders, al dij swaarden dij onze huzen inpikken. Dij mouten vot. Nederland is veur de Nederlanders. k Proat mor zo n bietje mit hom met. Nim vrundelk òfschaaid en run verder.
t Lokt, k bin al bie de Rode Loper. Doar goa k omdeel, de woonstroaden van t Knoal in. Laange bomenloanen woar ok altied wol aandre minsen joggen. Wie grouten nkander. k Stek rotondes over. En k kom altied körter bie mien doel. Laandsverdedegers zai k hier wol, mor dij zain mie nait. Dinken dak n gewone burger bin dij n toertje hardlopt.
En doar is t Stadsketoor. Noar de veurkaande, noar de hoofdingang. k Goa dij bom ploatsen binnen in t gebaauw. De gloazen deure schuuft veur mie open, k lop laangs de rezepsie hin.
“Mevraauw! Kin k joe helpen!” klinkt t veralteraaierd van achter de boalie. k Bin den al midden in de zentroale hal. Rop de beschaarmfolie van mien bomstikker òf en plak dij streveg tegen de liftschacht an. Zo, dij zit. t Is lokt.
Eerst noe is der schraauwen achter mie. Der slagt wat tegen mien bain. n Poarse flek woar de paintball mie roakt het. Nog n paintball tegen mien rugge. Nog aine tegen mien konte. Van alderwegens störmen laandsverdedegers op mie òf, griepen mie vaast. Mor joa, zai bennen te loat, stelt de kommendant vast. De bom is al ploatst. De mizzie van Infiltrant 2 is sloagd. t Stadsketoor is dinkbildeg ontplovt en de 100 laandsverdedegers hebben dat nait verhinderen kinnen. Mooi nait. Wie zellen t er nog wol over hebben in de evelewoatsie.