IJswoagen

Traktoat van Meppen 1824. De keunegen van Nederland en t keunenkriek Hannover spreken òf dat an baaide kaanden van de grìns n stroke van n kenonschot braid -dat was dou 377 meter- vrai holden wordt van bebaauwen. Om de smokkel tegen te goan.
Hanna kiekt op heur haanden. Ze het t apmoal noalezen en veurzichteg protestaaierd dou de börgmeester -zeg mor Joap- uutstokte dat Westerwolle n ekelogisch zunnepark wil tegen de grìns bie Over de Diek an. Ekelogisch, dus nait zuk ain groot lelk penelenveld mor penelen onzichtboar, verspraaid tusken t gruin. n Slag netuurgebied, zei Joap. En doar deurhìn den dat fietspad van de grìns noar t Boukwaaitveen, wat de Duutsers zo geern willen.
Kin dat wol om reden van dat Traktoat? Joap haar t votwuufd. De Duutsers zellen wol bezwoar hebben, mor dat wordt oplöst.

Hanna heurde moanden laang niks van de gemainde. En in t end kwaam der gain ekelogisch zunnepark, mor enkeld n fietspad deur akkerlaand laangs ain van dij lieke gruppels dij richten de grìns lopen.
En zie kreeg heur standploatsvergunnen. Mit heur klemoatneutroale busje mog zie biologisch boerenijs verkopen goan op t Boukwaaitveen, op de houke woar t fietspad begunt. Doar staait zie noe. Sumtieds sloat d’elektrische koulen van t ijs zoemend an. Om heur hìn, kilometers wied, gainain. Totoale stilte, enkeld wat zacht zoezen van de wind. Zie kiekt op heur haanden.

t Boukwaaitveen is n betonploatenweg deur t akkerlaand. Dou zie vummerdag an kwaam ree net n boer vot op zien trekker. Hai stook zien haand op. Verder zag zie d’haile daag nog gainain.
Toeristisch-rekreatief ondernemen. t Fietspad zol nije meugelkhaiden openen. De Duutsers in Neudersum haren al n Smokkelroute en dij is noe uutbraaid over de grìns. De Gaststätte in t dörp het n Schmuggelmahlzeit op de menukoarde zet. Braauwerij Westerwolle in Over de Diek het n Smokkelbier op de maart brocht. Noe den heur ijs. Hanna kiekt op heur haanden.

t Fietspad noar de grìns ligt der verloaten bie. An d’aandre kaande van t Boukwaaitveen kiekt zie tegen de boerenschuren an van Over de Diek. Ok doar verrept zok niks. Totoale stilte, enkeld zacht zoezen van de wind.
Langzoam nimt de stilte Hanna in bezit. Koulen sloat zoemend an. Zol t den doch? Dij bierbraauwer in Over de Diek is enkeld op zotterdag open veur bezuikers. En de Gaststätte zegt dat dij tou binnen, behaalve as ze mit te minzent tien personen komt. Zol t den doch? Hanna kiekt op heur haanden.

Zie het heur uut de noad waarkt veur dizze ijswoagen. Vergönnens, deplomoas, subsidies, ketrakten. In t grelle zunlicht speurt zie horezon òf, tot de bomen op de grìns tou. Enkeld de windturbines bewegen. Verder stille, niks. Kilometers wied niks.