Ien Oskerd
t Was op n oljoarsaovend ien loade joaren viefteg.
Ien Oskerd ging het ien dij tied met old en nij voak nogal tekeer.
Zo ook op dij oljoarsaovend.
Kwoijongen as wie waren wér alles noa klokslag twaalf uur ien Oskerd wat lös en vaast zat versleept. Dat was gebruuk ja.
Zo ook bie Cooperaotiewinkel van destied bedriefslaider Smook.
Boven etaloage van dij winkel was toun n plat dak. Ain van kwoijongens (zien noam za’k nait nuimen) kwam op t idee om n stoalen fietserek veur winkel boven op dat pladde dak te zetten.
Hai pakde dat swoare ding op en draaide noar t dak. Moar toun gong t verkeerd.
Hai draaide dat ding krekt verkeerd tegen spaigelroet aan van winkel.
Haile roet aan diggeln. Wie vot, want pliessie was aan ander kaant van dórp.
Hou dat verder oflopen is wait ik nait meer. t Was wel grode schoadepost!
Zulfde nacht wer bie t meulenhoes n tun met peerdevet omkiept veur deur van Jan Warmoeskerken dij doar toun woonde.
Zien wief was om drij uur snachts nog aan t himmeln en bounen om stroat weer schoon te kriegen.
Ze het aans niks doan dan schelden en vluiken op dij misselke kwoijongen.
