I.N.R.I.
In t Letijn, Grieks en Hebreeuws stonden dij letters boven t kruus,
mos van Pontius Pilatus, om Jeuden te pesten, dat ‘gespuus’!
t Volk snapde dij wunderlieke Jezus oet Nazareth nait,
veuraal Farizeeërs en Sadduceeërs bezörgde Hai veul verdrait.
Dij lastege man zee liekoet woar t op stond,
zie kregen bie Hom gain bain aan grond.
Hai poetsde de regels van heur zomor weg,
ok wizzeloars en tollenoars haren mit Hom dikke pech.
Noa n oframmeln en bespotten in Pilatus huus,
mos Hai dwaarspoale droagen as n dail van Zien kruus.
n Boer – Simon van Cyrene – het t van Hom overnomen,
aans was Hai nooit levend op Golgotha aankomen.
Dij ‘Liedensweg’ of ‘Via Dolorosa’ bestait nou nait meer,
hai is verdwenen bie nijbaauw al eeuwen heer.
Veroordailde wer mit n taauw over dwaarsbaalke trokken,
soldoaten luipen mekoar doarbie sikkom van sokken.
Hai höng n poar decimeders boven de grond,
twij moordenoars noast Hom bezweken terstond.
Deur Zien Voader en t volk vuilde Hai zok verloaten,
in t lest kon Hai ok zowat nait meer proaten.
Din nog bidt Jezus en Zien bee is n bevel,
Voader, vergeef ze heur zunden; t’ haile stel.
Zie wissen ja ok nait goud, wat ze deden,
mislaid as zie wazzen, deur dij farizeeën.
Mit Zien leste krachten ruip Hai Maria: Vraauw zai joen zeun
en tegen Johannus zee E: Hier is dien moeke, mien zeun.
Schriftgeleerden hebben Hom beschimpt en bespot,
en gruiven veur spotters aigen graf en bestempelden heur lot.
Ain poar zinnen het Hai nog sproken,
baindern werden bie Hom nait broken.
t Lieden was veur Hom toun al veurbie,
Hai haar t volbracht veur joe en mie!
In Gods haanden bevool Hai Zien geest,
ain troost veur elk mensk dij dit leest.
Mit Pinkster is Hai noar Zien Voader tou goan,
noadat Hai -noa drij doage- mit Poaske is opstoan !
Jezus van Nazareth Rex (Koning ) Israëli