Hebben joe dat ook?
Hebben joe dat ook wel ains?
dat je oet de baand springen willen?
Ains wat aans doun as normoal,
Laggen om aal, mit n aibels bult keboal!
Hebben joe dat ook wel ains?
t leven van aal dag wordt joe inains teveul.
Kriegen n hekel aan doaglekse sleur.
Gedou d haile dag en dat t haile joar deur!
Hebben joe dat ook wel ains?
dat je zin hebben, zomor maal te doun?
Omreden wat aans inains veul mooier liekt.
t Vaalt joe inainen aan, zunder dat je aargens noar kiekt!
Hebben joe dat ook wel ains?
dat je zunder aanlaaidens of zunder reden,
zomor voloet begönnen te schraiwen,
bie t heuren van meziek of aandre taiken?
Hebben joe dat ook wel ains?
dat je eefkes gain zin hebben in t waark?
Wat rond lummeln en goan stoan proaten,
t waark blift din liggen, kebouters bestoan ja nait!
Hebben joe dat ook wel ains?
zomor inains op n deurdeweekse dag,
dat je t haiaalmoal nait meer zain zitten,
omreden elks dij dag op joe lopt te hakkebieten?
Hebben joe dat ook wel ains?
dat je gain koors hebben, mor vlammen sloan je oet.
t Waark joe asmits nait van haanden wil?
Begrodelk genogt bestaait doarveur nog gain pil!
Elks vörkjed op zien aigen menaaier deur t leven.
dut doarbie wat goud en recht is in zien ogen.
Nemt t eerste wat hom veur vouten komt
en leeft zo zien leven tot d’ leste stond!
