Gijt ‘Mien Westerkwartier’ bóven mien Grunnen??

Geert Moatjes het nog mor krekt de rol beschuut noast de jonge kees ien zien karretje leid, of hij wordt op zien scholder tikt. Bietje veraltereerd kikt Geert wie hum doar steurt bij zien bezegheden. Bosschoppen doen, doar moet je de kop bijholden. Hij zigt de kniezende kop van Lammert Loos uut Olhoof, ‘Lammert Stiefkop’, die uut OostGrunnen noar aner kaant van Stad emigreerd is.
“Moi, Lammert, ok even n kar vullen?”
Lammert kiekt noar de nije AH-woagen van Geert. “Kár vullen? Dìn magst wel opschaiten, aans bist veur sloetenstied nait kloar.” Dan trekt e Geert aan zien jas met noar de kovviehoek, drukt m deel op e stoel en gijt zulf even twee bekertjes ientappen. “k Mout aal even mit dij proaten, Moatjes, over t Grunnegers en t Westerketiers, veurdat de Vraizen of de Drenthen heur invloud nog wieder vergroten, doar helpt ja gain Reinder Hiemstroa of Jelte Diekstroa tegen…”
Geert kikt de Olhoofster sprekert met open mond aan. Woar het t over?
“Woar het..”
“Is t Westerketaaier nou Grunnegs of nait? As wie t hebben over ‘der gaait niks boven Grunnen’, proaten we dìn inklusief of eksklusief t Tonko-Ufkeslaand?” “Joa, kiek es, Lammert, ik hol mij nooit zo met poletiek bezeg, hè. Ik denk mor bij ….” “Das gain poletiek, Moatjes, dat is kultuur! Dat het te moaken mit de menaaier woarop mìnsen léven, soámen leven. En doar heurt de toal ook bie, je moudertoal, je carrièretoal, je gehaaimtoal, goa nog mor even deur. En nou krieg ik hier in dit dail van Grunnen t idee dat ze wel verduveld slim bezeg binnen zok of te schaaiden van de rest van Grunnen. En dat is gain goie zoak, Moatjes, dat gaait verkeerde kaande op!” “Zol t, jong? Dat zal doch wel wat metvalen, de soep wordt ja…”
“Nee, Moatjes, dat vaalt om de dooiedood nait mit, t is krekt as mit n veenbraand, gaait onnergronds aal wieder en wieder en dìn inains ist malleur, kìn brandweer nog zo klooien, mor fik kriegen ze nait oet, zoakje reddeloos verloren. En dìn smieten Westerkwartierders kind mit badwotter vot, wat ik die brom!”
Lammert nemt n slok, bölkt zo slim dat ze hum bij de konkurrenten van Super de B. wis en vast heuren kunnen… Geert wordt schoonverlegen met e toaltoestand en de bölkerij van Lammert Stiefkop. As t woord ‘kultuur’ bruukt wordt, dan het e voak al eten en dronken….
“Moatjes, dou der denken om, dit kìn leiden tot slim male dingen. Nog even dìn ropt dien noamgenoot oet Paiterziel…” ” Nee, Lammert, dat is gien Paiterziel, mor Pieterziel, dat heb ik n moal heurd veur t kulturele programma van Radio Noord op zotterdagmörgen, met dij weerboer Bosscher, ‘Piéterziel’…”
“Moatjes, nou most mie nait veur t zootje holden, kin k min over, veur mie ist Paiterziel en blift t Paiterziel. En dij Geert Zielstroa veur Radio Westerketaaier duurt best de zulfstandege regio ‘Lemagrozu’ oet te roupen en dìn hei je de poppen pas goud aan t daansen. Hai krigt aaltied wel aargenswoar support vandoan. Wordt t net zo’n klerezooi as doar in Kosteveul of in Sakasvilistan. Dat mit dij schriefwedstried ook, schaive boudel. t Was n Grúnneger schriefwedstried en dìn mot je nait aal tamboeren op schrieven in t Westerketaaiers. Ik woon al sikkom 20 joar in Olhoof, mién Grunnegers is ook Grunnegers en…”
Op datzulfde moment wordt Lammert rompslomps onnerbroken deur n stem die luud en dudelk zegt: “Hier Radio Westerketier. Vandoag is om 13.00 uur sekuur n verkloaring veurlezen deur t veurlopege bestuur van de regio…”
“Kiek, heb je t gedonder al in de gloazen. Ik goa der vandeur, ik mout mien OostGrunneger boukjes votbaargen, veurdat ze op zuik goan noar opruiende lektuur. Dit komt nait goud, Moatjes, laang nait goud!” En vot is Lammert…
Geert kikt omhoog, persies ien t gezicht van Harm Proatjeboksem, woarop n dikke, vette laag vastbakt zit.
“Aal dat kultuurgezever van dij Loos, weg dermet. Schenk nog mor even ien, Geert.
Op zien Westerketiers!