Gelukkeg In De Regen
Alex Vissering het begun april zien nijste spaigelploade uutbrocht. Gelukkeg In De Regen is zien zesde Grunnegstoalege solo-album, mit elf nije laidjes over onderwaarpen dij we goud van Vissering kennen. Hai zingt geern over perzoonleke dingen, t Grunnegerlaand en t Wad, en het ook weer zien licht kritische kiek op hou t der heer gaait in de soamleven.
Vissering het n dail van zien inspiroatsie opdoan bie n raais deur Amerikoa, van Nashville noar New Orleans. t Laid Amerikoa, Highway 61 is n klaain verslaggie van dizze roadtrip langs The Blues Highway. t Is gain blues- moar n countrynummer, moar t kontraain woar de worrels van de blues liggen het wel zien invloud had. t Refraain is in de toal dij in Louisiana nog vrij veul proat wordt, t Fraans.
Hou zukse wiede raaizen of dat j’ook moaken, thuuskommen in joen aigen laand is ook altied weer goud. Zo zingt Alex Vissering over de Hoaven Van Delfziel en gaait t in Veraander Ik De Wereld over de wiede polders en over t Wad. Zo as hai al voaker in laidjes beschreven het, kin e doar goud tot zochzulf kommen. Of zochzulf tegenkommen, wat hom goud helpt om zien leven en zochzulf te reloativeern. Dat is wat e dut in t titelnummer.
De biezundere reggae Zolt, Peper, Siepels, Knoflook legt n verbinden tussen twij van zien laifhebberijen, de noatuur en lekker eten. Bie t kieken noar koien, zwientjes of aander daaier, denkt hai der wel es aan hou je dij t beste op smoak brengen kinnen.
Opa Vissering is wies mit zien klaainkinder. Dat jonkgoud kin ook n bron van inspiroatsie wezen en t verwondert den ook niks dat e Rachel en Siem touzingt. Baaiden hebben op t album n eigen laidje kregen mit Lutje Wicht en Junior. Hai kikt mit bewondern en verwondern noar de beudels, geft ze goie road en wil n grootvoader wezen om groots op te wezen.
De zesde van Vissering het n mingelmous van stielen, zunder dat t n toezeboudel worden is. De countrymeziek klinkt in meer laidjes deur, moar aander soorten van meziek hebben net zo goud n stee vonden op Gelukkeg In De Regen. De meziek is moakt mit instrumenten dij over d’haile wereld bruukt worden, dat is n verbindend element dij t album tot ain gehail moakt. Der zit ook n jenteghaid in dij typerend veur Alex Vissering liekt. De laidjes binnen nait zwoar op d’haand, ook nait mit moatschoppij-kritische teksten. De zesde is den ook weer n echte Vissering.
