Geluk

· Spelde, Bertus

Denkend aan geluk
Denk ik aan Knelis Kruier
Bie ons ien Hoogebrug

Hai zwom e ien t Damsterdaip
Tot draai aan tou
En din weer terug
Veul hoar haar e
Benoam op rug

n Riezege vrijgezelle man
Aaltied blied
Woonde bie moe
Toun allain
Moe kwam oet tied

Heb hom joaren nait zain
Mor met kerstdoagen aan Rieksweg
n Dikke snij-jacht veegt over t laand
Lopt Knelis veurbie
Nait allain
Mor met n vraauw
Haand ien haand

En t is net of inains t licht aan gaait
Hemmen twij minsen mekoar vonnen
Ien stil verlangen en stil verdrait?

Denkend aan geluk
Denk ik aan dij twij
Ien dat stroalende licht
En dwarrel van snij

• Facebook
• X
• LinkedIn
• Email
• Print

Gedichten

Meer van t zulfde:

• Duuster

• Twievel

• Hendrik

Achtergrond info:

Op dit stee willen wie geern wat informoatie over de schriever geven. Veur de lezer is dat vanzulf interessant. Wenneer geboren, woar komt hai of zai vot? Al meer schreven? En nog wat meer achtergrond. Schaande genog hebben wie dij informoatie nog nait (compleet). Doarom n oproup aan de schriever ons wat op te sturen.
 
Wie hebben veul waark van al wat joaren leden op de webstee stoan. t Kin vanzulf ook wezen dat de schriever al oet tied komen is. Doarom n oproup aan de noabestoanden om dizze informoatie te sturen, zodat noast t schriefwaark ook de persoon van de schriever in onze gedachten wieder leeft.