Geluk
Denkend aan geluk
Denk ik aan Knelis Kruier
Bie ons ien Hoogebrug
Hai zwom e ien t Damsterdaip
Tot draai aan tou
En din weer terug
Veul hoar haar e
Benoam op rug
n Riezege vrijgezelle man
Aaltied blied
Woonde bie moe
Toun allain
Moe kwam oet tied
Heb hom joaren nait zain
Mor met kerstdoagen aan Rieksweg
n Dikke snij-jacht veegt over t laand
Lopt Knelis veurbie
Nait allain
Mor met n vraauw
Haand ien haand
En t is net of inains t licht aan gaait
Hemmen twij minsen mekoar vonnen
Ien stil verlangen en stil verdrait?
Denkend aan geluk
Denk ik aan dij twij
Ien dat stroalende licht
En dwarrel van snij