Gelok
Binnen joe veur t gelok geboren,
Kriegen joe t grode geld zomor in schoede?
Of hebben joe moud allaank verloren
en bezörgt toukomst joe n sneue snoede?
Gelok zit nait aan boetenkaande
veur n miljoen kin je t nog nait kopen.
t Vaalt n mensk plotklaps in haand,
huift winkels der nait veur òf te lopen.
t Woord zulf telt mor vief letters,
dij vörmen dat hail belaangrieke ding.
Geldt ok ja veur binnenvetters
en wat t mit joe dut is nait gering.
Griep t mor aan mit baaide haanden,
Koester het zolaank as t meugelk is.
Zet in dat gelok joen taanden,
t is veurwoar gain kaddepis.
Paardie lu lieken der veur boren,
mor mouten der wel veur open stoan.
Wel nait heuren wil, mout vuilen,
aans zel t joe der noar vergoan.
Gelok allent moakt nooit riek.
Zai daanst aaltied mit joe as n boal;
dij t krigt, vuilt zok n keunenk gliek
en gaait mit bruud aan hoal.
Voak mouten joe der haard veur knokken,
voldounen krigt man pas aan t end.
Dou rusteg aan, aans moak je brokken,
gedroag je in alens as n nuvere vent.
