Geert Moatjes: Wat doen we hier en nou?

Geert zit ien zien aarmstoel, ien e koamer. Zo te zien het e niet veul ommaans. Gien boek of kraant ien e buurt, gien Sudoku, gien tillevisie of radio aan, nee, Geert zit noa te denken, te peinzen, te prakkizeren…. Dat doet e de leste tied wel voaker, beetje filosoferen over t Leven. Wat doen we hier en nou, woar moaken we ons druk om,
“Waartoe zijn wij….”, joa, zukswat. Dat krieg je as je older binnen asdat je wezen en wieten willen, dan zit t bewegen meer ie e hazzens as ien e bienen. Geert viendt t apmoal mor moeilek, benoam as t om de problemen, om de knelpunten ie e grode en ien e lutje wereld gijt. Harmke was al n moal of wat deur de koamer hen dendert, mor Geert haar zuk deur heur alledoags gedrag niet ien e ruden brengen loaten. Wat is nou n slaang van e stofzuger die tegen zien knij kletst vergleken bij de Kadafi-toestanden ien Libye? En dat Harmke höm n keer op e tenen trapt, dat is doch hiel wat aans as zo’n zelfmoordaanslag ien Kunduz?

Of e de stroat achter t huus even aanvegen wil, de vogels moaken der n troep van, aal die resten van t vogelzoad en de sauskes…. Nou, dan moet Harmke mor es kieken goan ien Christchurch doar ien Nij Zeeland, as je dat zien dan doe je zulf doch gien mond meer open over de truttegheden thuus? Mor hoe je doar as gewoon dörpsmìns op leeftied met omgoan moeten… Joa, je kunnen wel ies wat geld störten of ien e collectebus doen, mor of dat zoveul zoden aan e diek zet…. Doar ien Haïti hebben ze der ok nog niet zoveul van kloarmoakt en doar bennen ze al hoast weer aan n nije beving toe. En Iran? Neem nou Iran, dat is me doch ok n spultje van niks… Hebben ze doar niet zo laank leden n vrouw met n Nederlandse pas ophongen en bliksemsnel begroaven en nou willen ze heur niet meer terug vienden. Doar stoa je dan en as Rutte en Rosenkrans der niks aan doen kunnen, wat moet je dan as je as Geert Moatjes op e wereld kommen bent? En dan kan zien noamgenoot, die Limburger met zien widde kuif, t wel over kopvodden, over boerka’s hebben en over t verbieden van sharia’s en zo, mor wat speult die Wilders kloar doar ien Iran? Nul komma niks, die Ahmadinedinges die lust m rauw!
Harmke roept wat vanuut e keuken, mor Geert heurt t niet, het zien kop der niet bij, doár ien elks geval niet bij. Hij zit ien Kenya woar de homo’s gien leven hebben en Baptistische veurgangers doodschoten worden, en in Ivoorkust woar ze met twéé presidenten der al hielemoal niks van bakken. Nou, je huuft ja niet iens zo wied vot te goan, neem nou Itoalië met die paljas van n Berlusconi die allenneg mor schiere greune bloadjes lust, n slecht gebit zeker. Ierland, IJsland… En Duutsland woar n minister zo groag doctor wezen wol dat e kramp ien e vingers kregen het van t overschrieven van teksten van anern… Tjongejonge, dan is t doch niet zo gek hier met die minkukel van n Verhagen die ballonnetjes op let en ze zulf deurprikt: CO2? Nee? Nee! Haar hij zulf nou mor wat meer ontspanning, wat meer om e kop ies flink op te schonen…. Tillevisie viendt e ok al niks meer aan. Zit e net met smoak n pizza met ananas op te eten, zo’n lap van t 3e Perron, dat bennen de beste, begunnen ze doar ien e rekloame op TV zo neudeg n WC schoon te moaken…. En dat voetballen, dat stelt ok niks meer veur. Die Fransen tegen Real Madrid, niks aan. En die anere Fransen tegen Mansjester, niet veul beter…. Van Gaal tegen Sneijder, doar haren ze ok allenneg mor de leste vief menuten van speulen huft… Op wat veur voetbalvelden je ok kieken, je zien allenneg mor t iene Vreemdelingenlegioen tegen t anere speulen. Joa, ok ien e Euroborg. (Zien kammeroad nuumt dat n voetbalkathedraal, veur Geert is t niet veul meer as n blok beton, woar de verwarming van kapot is…) Die foto ien e kraant bevöbbeld, van e hikhakkerij van Granqvist tegen Kah… Hoe Grunnegs is dat dan wel?
De koamerdeur vlugt open, Harmke drukt Geert de bezzem ien e hannen en wiest met heur duum noar achtern. Geert wiet genoeg. Hij gijt stoan, is verdorie doch wat stief worden. Gien woorden, mor doaden…. Feyenoord ien t rechter riegje, der is wat vrumds met dizze wereld!