Gebörgenhaid
In Gods haanden vuil k mie börgen.
k Leg bie Hom mien zörgen neer.
En bringt mie toukomst ok wat zörgen,
vertraauwen blief k op Hom mien Heer.
Gezondhaid kin je naargens kopen,
nait in n winkel, aptaik of op internet.
wilst meschain doarveur best laank lopen,
vergraimde muite elke stap dij’st doartou zetst.
t Zit hom ja nait in dat aine kruukje,
dast op recept bie hoesdokter hoalst.
Medicien staait nait achter t luukje
en wordt nait deur het fonds betoald.
t Leven kin man nait verlengen,
deur t betoalen van n hoge pries.
Ok al komst miljounen brengen
begefst die allent mor op glad ies.
Man mit zaaize komt die hoalen,
ok as tied die nait recht paast.
Reken moust doe din betoalen,
dat staait as n poale vaast.
God bepoalt t joar, dag, uur en tied.
Het t bie dien geboort al in haand schreven,
houst en wenneerst ainmoal komst oet tied,
zegt Hai nait, hou t n mensk ok spiet.
Hulp en troost vindst aaid bie Hom,
dij die t leven toun aan ons het geven.
Luuster tou verdan mor noar Zien stem,
tiedens hail dien toumeten leven.
‘Ora et Labora’; bidt en waark is goud,
waark rusteg deur, of poot n boom.
Hest gain keur, ast komen moust,
neem ofschaaid en goa mit mit Zeun.
