Geboaren
t Gaait nait meer, haar hai zegd. Roar jong, haar zie docht. Gain zörg, dij komt wol weer terog.
Vieftegers waren zie noe. Kinders de deur uut, en zie haren t widde boerenploatske kocht. In Bleksloage bie de drijsprong. Zie wilde doar n teeschenkerij begunnen veur de fietstoeristen.
Mor hai was vot goan. Liet heur t boerenploatske, ging zulf in n huurwonen op Muzzelknoal. Der kwam n braif van de rechtbaank over n echtschaaiden. Zie geleufde t nog altied nait. Roar jong, dij trekt wol weer bie.
Mor as zie terog lopt van t bosschoppen doun op t Knoal is opins heur auto vot. Lege plek op de perkeerploats Lilienthalplaain. Zie votdoadelk noar de plietsie. d’Agent achter de boalie onderdrokt n glimlaag van herkennen. Joa mevraauw, doar waiten wie van. Joen man is hier west, het us meld dat hai d’auto metnam. Hai haar n kontaktsleudel en t kentaiken stond op zien noam. Dat hebben wie kontreleerd.
Zie geleuft heur oren nait. Achteròf herinnert zie zok dat hai al zo dikmoals om d’auto zoest haar. Zo van: doe t huus, ik d’auto. Zie haar t verdomd d’auto òf te geven. Roar jong, dat komt wol weer goud, wacht mor òf. Zie komt thuus mit de taxi. En doar staait ok heur dochter, mit heur spullen dij in d’auto lagen. Zie kookt, laaiend is zie. Roar jong, dat hai zulf dij spullen nait weerom brengen komt.
En noe den de rechtbaank in Grunnen. Doar zit hai mit n avvekoat, te wachten op de zitten. Zie geboart noar hom, mit heur gezicht, heur aarms, handen. Even kieken hai en d’avvekoat uut heur ooghouken. Verder doun dij asof zie niks zain. Roar jong, kom weerom, den vergeten wie alens.
Heur geboaren goan n aigen levent laaiden, worden heur de boas. De rechtszitten begunt, wat dij zeggen gaait langs heur hin. Zie zegt gain woord, blieft mor wenken noar hom, nikken. Heur heufd dout met, heur aarms, handen. Hai en zien avvekoat zitten mor en zain niks. Heuren nait dij stille stem uut heur binnenste. Dij sprekt uut heur ogen, t vringen van heur mond, optrekkende wenkbraauwen, vingertoppen. Roar jong, kom weerom. Vergeet alens, kom bie mie. Kom asjeblieft weer terog.
