Fantesie
Hoezie? Houst? Moi! Hou gaait t? d’Eerste baaide binnen van nou, d’aander baaide wat older. t Moakt nait oet, hou of je n aander benoadern, as t mor goud bedould is! Aait eerst even vroagen, hou of t gaait dut d’aander goud.
n Joar of wat leden, wol k bruier n braif sturen, mor k wos nait hou of k begunnen mos …
![](https://dideldom.nu/wp-content/uploads/2023/09/afbeelding-134.png)
Eerst mor ais vroagen, hou of t mit hom gaait. En dou ging t loos! Kerel man, wat komt ter den n fantesie boven. Lees mor even mit:
Moi Bruier,
Hou gaait t? Kinst der nog n beetje tegen? En gaait t mit kinder ook nog aal goud? Hier gaait t oareg nuver, dus gaait t hier goud! Je waiten mor nooit, hou t goan zel, hè? Elk wil geern dat t aal mor goud gaait, toch? Bie t heuren dat t hier goud gaait, gaait t bie die vast ook weer wat beter.
En hopelk gaait t den bie joe ook goud.
Nou ja, nait alles is meer honderd persent vanzulfs, mor dat zit hom in de botten. t Lopen wordt bie ons wat minder en je kriegen wat minder energie. Nait alles gaait meer zo as vrouger. De gang gaait der wat oet, zeg mor. Dat mout je den mor akseptaaiern, old wezen is ja hail wat aans as old worden. Zo as k al zee, t gaait hier oareg nuver en den gaait t veur ons leeftied ja goud. As je aal zemeln, dat t nait zo goud mit joe gaait begunt d’aander dat gaauw te verveeln!
Zo nou en den der even oet … wat òflaaiden is voak n wondermiddel. De kop leeg en t gaait weer stukken beter! Bievubbeld noar Hofsteenge in Rolde. Treden voak mooie groepen op. Of noar Grolloo – ook n Hofsteenge. Femilie? k Wait t nait. Gaait mie ook ja gain donder aan! Lokoatsies zat, woaras je joen lamlendeghaid kwiet kinnen. Even op verhoal kommen, zodat t wat beter gaait. Op t rad gaait ook nog nuver…. Rondje Blaauwestad, of n heerntje eten in Termunten is beslist nait verkeerd. Gaait der lekker in!
Ons jongste klaaindochter kin mit 39 groaden koorze op bèrre liggen … As je heur den vroagen, hou of t gaait, is t antwoord: ‘Och, t gaait alweer n beetje beter opa!’ n Staarke maaid, gain zeurder. As kinder zo nuchter binnen, gaait mie t haart der van open!
Mor nait elk is geliek. Partie lu gaait t oareg minder. En dat gaait den voak weer over op heur kinder! Ja, en as je tillevisie kieken of kraante lezen, liekt t wel of d’haile wereld in braand staait. Zo is t noatuurlek nog nait, mor zo te zain leuf k nait dat ‘vrede op aarde’ op t heden veurop gaait. Mor doemen, dat t overal weer goud gaait. En hopen dat de wereld nait noar de verdoemenis gaait.
Zo, dat was hail wat mit t woordje gaait.
k Was ook n moal mit n Gait noar daaierntoene in Emmen. n Schiere dag mit had: doe begripst wel, dat t hier om n man gaait toch? n Biezunder woord, dat ‘gaait’. As je t zo voak broeken, is t net of t naarns over gaait. Dat hoop ik dus nait. Mor as t wel zo is, hoop ik dat t lagen die nait vergaait. Hier mor stoppen ducht mie … gaait ook ja veuls te veul pepier kosten.
Het ga je goed! (heurt toch beter?)
Holt joe taai. En as t wat minder wordt, der nog haarder tegenaan. Wie bennen Zonneveldjes, waist t nog?
De mazzel!
Klaas
MOI!