Even kwedeln
Dit joar al weer twaalf en haalf joar leden, verkasten wie van n hoeske in t veld noar t centrum van Scheemde.
‘Hou gek binnen ie den?’, was voak de reactie, as wie t vertelden. ‘Woonst hier ja in t parredies! En nou wilst noar n doevetille? Hest ja hailendaal niks meer om handen! k Zol mie nog mor ais bedenken!’ Joa, en den begun je te twieveln …..Al n stok of wat woonbeurzen haren wie bezöcht, mor nog niks vonden. Noa zo’n twij joar n grode advertensie over n bouwplan in t centrum. n Nije supermaart mit doarboven 12 appartementen. Dat wast! ‘Toupakken mor’, zee moeke, ‘t liekt mie wel wat.’ Loater kwamen der nog wel wat twievels over of der wel genogt zunne wezen zol!
In t veld konden wie doar volop van genieten!
Zunne rondom! Gelokkeg is t hier nait minder. Ja, en den woon je doar zomor al weer twaalf en haalf joar! Woar blift de tied? k Mout eerlieks zeggen, dat wie der nooit n dag spiet van had hebben! Ten eersten is der veul dieverdoatsie op t plaain en dat was d’eerste tied voldounde oflaiden om ‘t parredies’ oet kop te kriegen. Joa, gain waark meer. Doar mos we wel n beetje aan wennen … Wat n weelde! Aal doage allaint mor doun, woaras je zulf zin in haren! Noar de bozzen in Drente, fietsen in Vraisland, Overiessel en nog wieder vot! Gain gezeur meer: ‘Wie kinnen wel n dag of wat vot, mor ik wil tegen t wiekenne weer noar hoes. Bonen mouten aan zied!’ En nooit meer aine vroagen, of e de hounder, vizzen en eenden vouern wol! Wat toch ook voak nait ging zo as je t wend binnen … Nee, pure riekdom, zo’n doevetille! Guster was moeke even noar t wicht aan d’aander kaante van d’brogge. Zulf zat k wat te pasjansen achter d’computer…
Nog mor even kwedeln!
Zo docht, zo doan …… An d’linker kaande via de noodtrap noar beneden, even over t plaain veur de super langs en … d’eerste kwedelerij kin al begunnen! Voak dou k over d’ofstand van n lutje viefteg meter (veurfront super) wel twij uur. Aal bekenden! Femilie, vrunden van de sport en Zunnebloum en nog veul meer … Joa, de C1000 dut t hier beregoud. Wat n volk!
Nog mor even n pakje vergif hoalen, docht ik bie t opsteken van n pafke. Der zaten nog drije in en ik wol nait mit n jankend gevuil noar nicotine op bèrre! Versloafd! Joa, hailendaal! Aarg? k Wait t nait. Denk wel, da k tot nou tou n hoop mazzel had heb … Ben in mien zeuventegste smookjoar! Dat even terziede.
In d’winkel n knuvvel van n Zunnebloum-collega. Mit d’ain he je dat, mit n aander nait. Achter ons twij vraauwlu, dij voak mit oetjes van de Zunnebloum mit goan. t Wiesvingertje zwaait henneweer en mie wordt dudelk moakt, dat dat nait heurt! Wazzen ze vrouger nait wend, docht ik. ‘Ho ho’, zee ik ‘Nait jaloers wezen! Wol je ook aine?’, en k greep heur om zied … ‘Nee, dank je’, was t antwoord verschrikt. Deuske gif kocht bie de balie en in tied da’k t knipke in buutse dee, opains n smak achter mie …..Henderk, ook n zwoare versloafde wol tou zien scootmobiel oetstappen, mor dat ging mis! `Oh, mien heupe’, jammerde hai mit n verwrongen kop. Mis, docht ik, dij het heupe broken! t Wichtje achter teunbaanke greep vlot heur mobieltje en belde 112.
Veur dat d’ambulaanze der was, verstreek der nogal wat tied. ‘Help mie mor even overenne, piene is al vot’, zee Henderk, dij t al n zetje verveelde.
‘Nee, dat kin nait. Wie wachten op hulp en dij mouten waiten, wat of der wieders gebeuren mout!’
‘Och here, mou’k noar t zaikenhoes? Dat kin k ja nait wachten!’
‘Dou we toch mor, is beter veur die en wie maggen die ook nog wel n beetje lieden!’ ‘Meschain is t mor veur even? Kinst vanzulfs nait voetballen mörn!’
‘Oh, mor dat haar k al ofzegd … k wol scheuveln!’ De broeders konden waaineg vinden, piene was vot! ‘Veuroorlogse botten he!’, zee Henderk laggend. ‘Enne omringd met goud wat vet en spek!’ ‘Wie brengen joe nait noar t zaikenhoes…. ie goan noar hoes!’
‘Dat dut mie goud’, zee Henderk dankboar. Kin k tenminsens n sigaartje roken!’ ‘Den moust ze wel mitnemen vanzulfs’, ruip k hom noa. Greep ze gaauw oet t mandje van zien scootmobiel en laangde ze hom tou!
Hai laangde mie n haand: ‘Bedankt mien jong! Bliede dat wie even kwedeld hebben! Enne … as k mien sigaartje dammeet op steek, zel k aan die denken. Moi!’