Eetterepeut

Moi luusteroars, vanmörn is bie ons aanschoven as gast van de dag: perfester psichioatrie Kloas-Jan Kuper. Hij het al n tiedje n praktiek as eetterepeut. Kloas-Jan, wie hebben òfsproken dat we “doe” tegen mekoar zeggen, vertel ais, wat is n eetterepeut?
n Eetterepeut is n begelaaider veur lu dij deprezzief binnen, overspannen, n burn out hebben of zukswat of gewoon wat zenuwachteg binnen of ainzoam. n Eetterepeut helpt zuksen om heur verdrait of heur deprezzie as t woare weg te eten.
Mor nou hest doe n joarenlange ervoaren as psichoater en nou bist al n joar of vieve perfester, doe waist alles van medezienen en proatgroepen, en van kreatieve terepie, hou bist ter den bie kommen om eetterepie te geven?
Dat zel k die vertellen. Der binnen in Nederland bienoa n miljoen mìnsen dij medezienen slikken tegen deprezzies. Den binnen der nog n n poar honderddoezend dij medezienen hebben veur angsten, veur woandenkbeelden, en nuim mor op. Dat is ja nait normoal. En den heb k t allinneg nog mor over lu dij bie d’dokter kommen. Veul lu duurven der ook nait goud over proaten. Ik zeg altied mor: “Der binnen twij soorten mìnsen, gekken dij der veur behandeld worden en gekken dij der nait veur behandeld worden.” En waist doe, aal dij medezienen binnen nait goud veur d’hazzens. Dat geft aal biewaarkens en op t lèst waist nait meer ofst nou roar van de medezienen bist of van d’deprezzie, om t mor even zo te zeggen. En aal dat geproat en geknutsel het ook mor n bepaarkte invloud op d’genezen van mien kliënten. As t aal goud zol waarken, zol der toch gainent meer zaik wezen? Of nait den? Dus noa joaren bist dat geklooi zat. Den gaaist wat prakkezaaiern en op zuik noar wat aans, woar lu echt wat aan hebben.
En dat wuir eetterepie. Mor woarom juust dizze vörm? En nait aans wat as yoga of klankschoalknovveln?
k Bin n man van de waitenschop, zuksoort geplaas mout k niks van hebben. k Kwam op t idee toun ik wat zat te miemern over wat d’Franse filesoof Pascal zègd het. Hai zee dat je n mìns, hou verdraiteg e ook is, wat òflaaiden geven mouten, den is e teminzent gelukkeg tiedens dij tied dat e òflaaid is. En hou gelukkeg aine ook is, as e gain òflaaiden het, gaait e zok vervelen en den wordt e tosteg en gaait e mottjen. Toun ik doar wat over zat te miemern, kreeg ik t idee dat we t aal veul te ingewikkeld moaken. Al dij pammeggies en proatgroepen en DSM-vieve kwoalen … Der binnen straks nog meer stoornizzen en òfwiekens beschreven as dat ter mìnsen rondlopen. En mor pillen draaien en mor pillen slikken. Dus ik docht: weg mit aal dij chemische troep en aal dij vroagenliesten. Gewoon lekker òflaaiden zuiken, niks meer en niks minder. En zeg nou zulf: mous mit rookworst is toch veul lekkerder as zo’n seroxatpille? t Is aal nait zo stoer as t liekt. – En hou gaait dat perzies?
Ik bin al wat aan t uutfigelaaiern wèst mit wat studenten van mie. Wie hebben op dit mement vieftien eetgroepen. Dat binnen groepen van om en de bie zeuven mìnsen. Dij eten twij moal in d’weke om d’beurt bie mekoar tuus.

Den hebben ze gezelschap aan mekoar, ze proaten wat mit mekoar over alledoagse dingen en over heur verdrait of muites. Mor t belangriekste is dat ze lekker eten goan. En ook n hail belangriek punt is de krisistillefoon, zo as wie dat nuimen. As der aine omhoog zit, kin e n aander bellen en den goan ze soam d’stad in veur wat snelle eterij. n Kop kovvie mit n gebakkie of n lekkere pude petat mit n frikandèle. En dat alles onder deskundege laaiden van n eetterepeut dij vanzulf òf en tou ook aanschoft.
En dat helpt?
Wie hebben dat onderzöcht en t bliekt dat t goud helpt. Viefenzeuventeg persìnt van d’mìnsen dij wie vroagd hebben, is stopt mit d’medezienen en t gemiddelde reportsiever van mien kliënten voor dizze terepie is n achtenhaalf. Veur aander terepieën ligt dat op zesenhaalf. En n eetterepeut kin zo’n vieftien groepen aansturen, das veul goedkoper den aander terepieën en d’haile pillendraaierij.
En d’lèste vroage: woarin verschilt n eet-terepeut van n gewone psichoterepeut? Wat mout zo aine goud kinnen?
Hai mout nait zwoarmoudeg wezen, t mout n smuie proater wezen en t belangriekste: hij mout van lekker eten hòlden en veul aan sport doun.
Nou lu, as je wat meer infermoatsie hebben wil-len, kinnen je bellen mit t siktoarioat van d’fakulteit Psichioatrie van t Akkedemie. Kloas-Jan, bedankt voor dien uutleg. Wie goan even n ploatje draaien: ‘We are spirits in the material world’, n ollechie van The Police.