Ede Stoal
Dit joar, wonsdag 22 juli, om persies te wezen 30 joar leden, wer t veur Ede donker en nooit weer licht.
Ede is n rad aan mien woagen dij aal, dij aal mor wieder gaait t draaien zal nooit vertroagen
want stilstoan, nee dat dut e nait. (FW)
Op t kruuspunt van Grunnegs en Engels, wait Ede de laifde in “As Vaaier Woorden” (ik hól van die) en “When Three Words Fail” (I love You), meroakels mooi soamen te vougen.
As vaaier woorden die niks meer zeggen, en t ook gain zin het t oet te leggen.
When three words Fail, and can’t be said, and all around is cold and dead.
![](https://dideldom.nu/wp-content/uploads/2023/09/afbeelding-56.png)
Ede Stoal haar n goave in zeuven verschillende sproaken te zingen, alewel der schaande genog van zien 86 laidjes mor om en bie 20, tiedens zien aigen muzikoale roem van nog gain vief joar, oetbrocht binnen.
Drij van zien vattien Nederlandstoalege laidjes het Ede schreven op gedichten van Gerrit Achterberg en vief in t platduuts op gedichten van Wilhelmine Siefkes, n schriefster oet Leer en drij Duutstoalegen binnen van de haand van Ede zien pa. Drij joar noa t overlieden van Ede binnen ook 23 van zien zulf insproken verhoaltjes oetkomen. Dizze “Zuzooitjes” wazzen onderdail in t Radio Noord -pergram “Sloaperstil” van Simon Reker op zundagmörgen.
Ede woonde op zeuventien plekken in pervinzie Grunnen en Drenthe: Waarvum, Lains, twij moal in Stad, n Daam, Dundern, Veendam, Griessloot, Kibbelgoarn, Westerlij, vaaier moal Nij Scheemde, Nij Stoatenziel, Nij Beerte en Delfziel. t Eerste optreden, van om en bie 20 in totoal, was in okt ‘83 in de Meulenbaarg en d’leste in de Klinker in Winschoten soam mit Liane Abeln in meert ‘86, om en bie vaaier moand veur zien overlieden.
Op 22 juli 1986 kwam der, aan de Farmsumerweg in Delfziel, noa sikkom 45 joar n ènd aan t
Credo van zien bestoan.
Wel haar dou docht, dat nou datteg joar loater, zien toal en taiken nog altied op ainzoame hoogte staait in d’wereld van aal wat Grunnegs is. Zal der ooit weer n “Ede” komen dij mit dit levensgevuil ons zoveul vree in t gemoud brengt?
Oetzonden in t pergram ‘Noordmannen’ op Radio Noord, 19 juli 2015