Droadproat: n Facebook-interview mit Bert Hadders
Zanger-laidschriever Bert Hadders (Twijde Mond, 1962) zien leven staait haldaal in t taiken van de meziek. Noast aktieve meziekmoaker is of was hai o.m. discjockey, manager en ploatenboas. Hadders het in de Meertmoand de DvhN Streektoalpries uutlangd kregen veur zien daarde album ‘De Bosklopper Tapes’. Mit laidjes doarvan was e te zain en heuren in de veenkelonioale theoaterveurstellen ‘Iemandsland’, woar hai ook ain van de drievende krachten achter was. Bert Hadders is bliekboar voltied mit meziek aan dloop. Kreuze wil es mit hom aan de proat.
Bert, t is nou vaar moand leden dast de Streektoalpries uutlangd kregen hest. Bist der nog aal bliede mit?
“Joa, vanzulf. Zoveul vaalt der nait te winnen veur n Grunningstoalige act en t was per slot al de daarde moal dat we nomineerd waren.”
d’Aandere kanshebbers waren de dvd ‘De Nije Man’ van toneelgroep Waark en Harry Niehof mit zien album ‘Twijduustern’. Woarom bistoe de winnoar?
“Wel zol t zeggen? Messchain omdat we aan de beurt waren? Zowel Harry as Waark heb ik huil hoog zitten, mor as we den toch mitdoun wil k wel groag winnen.”
Dij Bosklopper tapes waren letterlek of figuurlek n goie vondst. Hest die doarmit as artiest verriekt of vernijd?
“Muzikoal was t n terugkeer noar de worrels. Ik bin ooit begonnen as zanger in n bluegrass band in joaren tachteg. Dus interesse veur country, rockabilly en aanverwanten zat der altied al in. In de popmeziek wordt van joe verwacht dat je vernijend bezig binnen. Dit was n aangenoame aanlaaiding om es lekker ollerwets bezig te wezen. Mien muzikoale zuiktocht begeeft zug aal meer in richting van t verleden. Hedendoagse popmeziek aargert mie meer den dat t mie plezaaiert.
Zol leeftied wel wezen.”
Dien albums binnen meer as allenneg moar ploatjes mit n riege laidjes derop, moakst ook veul waark van t deuske en t tekstboukje. Is dat belangriek veur die?
“Design, vörmgeving, kunst, fotografie: t interesseert mie apmoal. Zun cd is n goie kaans om joe doar mit bezeg te holden. Kinst dien favoriete kunstenoars, taikenoars en zukswat der op lös loaten. Noast dat ist ook wel neudeg om minsken portemonnaie te loaten trekken. Meziek mout ja vergees wezen tegenwoordeg. Mor veur n mooi deusie willen ze wel betoalen.”
De leste poar joar is n haile riege artiesten mit de Grunneger toal aan d`loop goan. Hou komt t dat der zo’n opgang is?
“Stichting Nij het veul muzekanten uut t Engelstoalege circuit over de streepe trokken. t Was loos om goie muzekanten in t Grunnings te loaten zingen in ploats van Grunningstoalege minsken meziek of teksten te loaten schrieven. t Blift n vak per slot van reken. Hest muzekanten neudeg. Allenneg Grunnings wezen is nait genog.
Dij muzekanten uut de bandjeswereld waiten beter hou ze t zoakelek en muzekoal mouten regelen en binnen nait overleverd aan producers dij wel n teepje mit achtergrondmeziek in mekoar flansen. Dat het kwaliteit enorm goud doan. MInsken as Harry Niehof, Jan Henk de Groot en Edwin Jongedijk waiten donders goud hou ze n laidje mouten schrieven, n band soamenstellen of n ploate moaken. n Pionier op dat vlak is Erwin de Vries dij dat al joaren professioneel aanpakt.
Bie Omrop Fryslân en RTV Drenthe kieken ze mit verboazen noar Grunnen.
Veurwoarde is netuurlek wel dat dij artiesten op regionoale radio en televisie veurbie kommen. As dat nait gebeurt, worden der gain ploaten verkocht en zitten de zoalen haalfvol en den is t vot gebeurd mit de regionoale cultuur.
Aansom ist vanzulf ook zo dat dij artiesten de regionoale omroupen n dail van heur identiteit bezorgen.
Kinst wel de huile dag Volendammer zangers draaien, mor den wil ik nog wel es zain of der over 8 joar nog subsidie veur zun omroep is.”
In 1998 zongst dien eerste Grunneger laid, mit de band Ouwerkerk en ‘Piepen liggen plat’. Toch het t nog n zet duurd veurdast echt overgoan bist noar t Grunnegers ……
“Ik zag veur miezulf gain plek tussen de artiesten dij der doudestied waren. Zo as boven al beschreven: n aander wereld. En nog ist n man tegen man gevecht. Elke luusteroar mout over de streepe trokken worden. Grunnegers doun doar laang over. Mor as ze hest roakst ze ook nait snel weer kwiet.
Ik speulde in Nijmegen. Minsken vonden t prachtig. Ain kirrel belde enthousiast noar femilie in Grunnen: ‘k Heb hier Bert Hadders zain. Dij is bie joe zeker wereldberoemd?’ Antwoord uut Grunnen: ‘Joa, wel es van heurd. Mor t is gain Ede Stoal’.
As ik in mien geboortedörp speul kommen der datteg man kieken. Zulfs volk dat n vrijkoartje het komt nait. Doar most den wel tegen kinnen. t Is n laange weg ….”
Hest Grunneger laidteksten schreven veur Lou Leeuw en Gerry Wolthof, dij gewoonlek in t Engels zingen. Is t n uutdoagen veur die om artiesten aan de streektoal te kriegen? “Joa, dat vin k mooi! Wie hebben n studio, n band en n ploatenlabel en meer laidjes den we zulf kinnen zingen, dus woarom nait? En, mien aigen nummers op radio heuren vin k t mooiste dat der is, of k ze nou zulf zing of nait. Der is ain zanger in Stad dij proat, denkt en dreumt in Grunnings mor zingt altied Engels. Ik zeur hom al joaren aan de kop. As dij in t Grunnings goat schrieven kin de rest wel inpakken. Ik nuim gain noamen mor ik krieg hom nog wel zo ver…”
k Leuf dat ik wait over wel dast t hest. Dut dij artiest zochzulf en t pebliek tekört deur zoch nait van zien aigen toal te bedainen? En geldt dat veur meer artiesten?
“Dij wel, aandern nait. Most wel n beetje de weg waiten in de Grunninger toal aans wordt nooit wat.”
Is Grunnen n veurloper in streektoalmeziek? En verdainen wie nait veul meer landeleke aandacht?
“Dat zol k nait waiten. Gain idee wat der bevubbeld in Brabant loos is. Sommige dingen binnen veural leuk veur ‘native speakers’, aander dingen binnen muzekoal zo interessant dat t nait uutmoakt in wat veur toal t zongen wordt. Soms binnen we in Hilversum en den wordt t goud ontvangen. Bevubbeld bie Kunststof op Radio 1, woar ze n uur mit ons uutzonden hebben. Wie binnen wat meer de folk-kaante uutgoan woarbie de teksten belangrieker binnen en de instrumentoatie nait geliek aan de leste mode voldoun huift. Mor den huifst bie de maiste radiostations al nait aankommen.
Mor ofgoande op de Buma-inkomsten worden we toch oardeg voak draaid. Radio Noord, Oost, Drenthe en Omrop Fryslân hebben bie mekoar meer luusteroars den menig landeleke zender most mor reken.”
Wat was veur die de reden om mit dien aigen toal aan d’loop te goan?
“Dat ik mie doar beter in uutdrukken kon den in t Engels. Nederlands was op ain of aander menaar gain optie. t Nummer ‘Volluk’ het mie overtuugd. Dat haar ik nooit in t Engels kind.”
Hest n braide interesse wat meziekstielen aangaait en dat klinkt ook dien meziek deur, zo as blues, rock en country. Is der ook n genre woarst die nait aan woagst?
“Neuh, ik wil miezulf nog verder bekwoamen op gitaar, zodat as ik allain speul der wat meer te heuren is as plonkie, plonkie, plonk. Bin ook bezeg mit pianospeulen, Dat levert ook weer ander meziek op en der is n aanbod van n harmonie- en van n symfonieorkest. Most t veural veur diezulf interessant holden. Verder goan we noa t succes van ‘Iemandsland’ deur mit theatermeziek. Ook n vak apaart.”
Bie d’uutlangen van de Streektoalpries hest zegd dat t Grunnegers mit datteg joar nait meer bestaait. Mainst echt dat t zo gaauw gaait? “Wel zol t zeggen? As wie ons kinder gain Grunnings loaten proaten staarft t mit dizze generoatie uut. Henk Scholte wordt honderddatteg, dus zo laank zol t nog wel duren.”
Moar as t aan die ligt …
“Mien lutje potje is net geboren. Dij kin mit gemak honderd worden, zegt de waitenschap. Den leer ik heur Grunnings mor mit wel zel ze t proaten?”
Bert Hadders, daank veur dizze Droadproat. t Leste woord is aan die.
“Tjeu!”
![](https://dideldom.nu/wp-content/uploads/2023/08/afbeelding-237.png)
‘De Bosklopper tapes’
Bert Hadders en De Nozems
€ 14,99 Te koop bie o.m.
https://www.platomania.eu/ Bert Hadders zien webstee: https://berthadders.nl/